Киевга АҚШ Конгрессининг Вакиллар палатаси спикери Нэнси Пелоси ташриф буюрди

АҚШ Конгрессининг қуйи палатаси спикери Нэнси Пелоси Украина пойтахтига келди. Пелосининг Киевга сафари ҳақида олдиндан хабар берилмаган.

Киевнинг ҳукумат кварталига Пелоси ва ҳамроҳларининг ташрифи акс этган кадрларни  Украина президенти Владимир Зеленский ўзининг Telegram каналида эълон қилди. «Давлатимиз суверенитети ва ҳудудий яхлитлигини ҳимоя қилишга кўрсатган ёрдамингиз учун ташаккур!», — дейилади Зеленскийнинг постида.

Аввалроқ АҚШ давлат котиби Энтони Блинкен ва мудофаа вазири Ллойд Остин Киевга ташриф буюрган эди. Зеленский билан учрашув давомида улар америкалик дипломатларни Украинага қайтаришга ва яна ҳарбий ёрдам юборишга ваъда берган. 28 апрель куни эса Киевга БМТ бош котиби Антониу Гуттериш келган. Унинг ташрифи чоғида Киев марказига ракеталардан зарба берилган.

Россиянинг Украинага босқини бошланганидан бери Украинага айрим хориж сиёсатчилари ташриф буюрди, хусусан, Евроиттифоқнинг ташқи ишлар масалалари бўйича олий вакили Жозеп Боррел, Еврокомиссия раҳбари Урсула фон дер Ляйен. Улар Киевга 8 апрель куни келганди. Шунингдек, Буюк Британия бош вазири Борис Жонсон, Австрия канцлери Карл Нехаммер ҳам Киевга ташриф буюрган.