Kiyevga AQSH Kongressining Vakillar palatasi spikeri Nensi Pelosi tashrif buyurdi

AQSH Kongressining quyi palatasi spikeri Nensi Pelosi Ukraina poytaxtiga keldi. Pelosining Kiyevga safari haqida oldindan xabar berilmagan.

Kiyevning hukumat kvartaliga Pelosi va hamrohlarining tashrifi aks etgan kadrlarni  Ukraina prezidenti Vladimir Zelenskiy o‘zining Telegram-kanalida e’lon qildi. “Davlatimiz suvereniteti va hududiy yaxlitligini himoya qilishga ko‘rsatgan yordamingiz uchun tashakkur!”, — deyiladi Zelenskiyning postida.

Avvalroq AQSH davlat kotibi Entoni Blinken va mudofaa vaziri Lloyd Ostin Kiyevga tashrif buyurgan edi. Zelenskiy bilan uchrashuv davomida ular amerikalik diplomatlarni Ukrainaga qaytarishga va yana harbiy yordam yuborishga va’da bergan. 28-aprel kuni esa Kiyevga BMT bosh kotibi Antoniu Gutterish kelgan. Uning tashrifi chog‘ida Kiyev markaziga raketalardan zarba berilgan.

Rossiyaning Ukrainaga bosqini boshlanganidan beri Ukrainaga ayrim xorij siyosatchilari tashrif buyurdi, xususan, Yevroittifoqning tashqi ishlar masalalari bo‘yicha oliy vakili Jozep Borrel, Yevrokomissiya rahbari Ursula fon der Lyayyen. Ular Kiyevga 8-aprel kuni kelgandi. Shuningdek, Buyuk Britaniya bosh vaziri Boris Jonson, Avstriya kansleri Karl Nexammer ham Kiyevga tashrif buyurgan.