Россияда асосий ставка йиллик 17 фоиздан 14 фоизгача пасайтирилди. Қарор Марказий банк директорлар кенгашининг 29 апрель, жума куни бўлиб ўтган йиғилишида қабул қилинди.
Россия иқтисодиёти учун ташқи муҳит қийинлигича қолмоқда. Бу иқтисодий фаолликни сезиларли даражада чеклайди. Нархлар ва молиявий барқарорлик учун хавфлар ўсишни тўхтатди. Бу эса асосий ставкани пасайтириш учун шароит яратди, — дейилади ҳисоботдаРоссия Марказий банки агар вазият жорий йилда базавий прогнозга мувофиқ ривожланса, яна ставкани пасайтиришини маълум қилди.
Россияда инфляция кейинги ойларда базавий эффект туфайли ўсишда давом этиши ва 2022 йилда 18-23 фоизни ташкил этиши кутилмоқда
Регуляторнинг прогнозига кўра, жорий йилда ЯИМ 8-10 фоизга қисқаради. Бу пасайиш асосан таклиф омиллари билан боғлиқ бўлади.
2023 йилда Россия иқтисодиёти босқичма-босқич ўсишга ўтади, деб тахмин қилмоқда Марказий банк. 2023 йилнинг тўртинчи чорагида ишлаб чиқариш 2022 йилнинг шу даврига нисбатан 4-5,5 фоизга юқори бўлади.
Россия банки директорлар кенгашининг асосий ставка даражаси масаласини кўриб чиқадиган навбатдаги йиғилиши 2022 йил 10 июнга режалаштирилган.
28 февралда Россия Марказий банки асосий ставкани йиллик 9,5 фоиздан 20 фоизга оширган эди. Бу 2013 йилдан бери энг юқори кўрсаткич бўлди. Қарор Россия қўшинларининг Украинага кириши муносабати билан жорий қилинган Россияга қарши кескин санкциялар фонида қабул қилинган.
Март ойининг ўрталарида Россия банки асосий ставкасини йиллик 20 фоиз даражасида сақлаб қолди. 8 апрель куни регулятор асосий ставкани 17 фоизга туширди. Бу Россия фонд бозорида рублнинг мустаҳкамланишига катта ҳисса қўшди.
Изоҳ (0)