Европа Иттифоқи санкцияларининг янги пакети Россиядан нефть сотиб олишни тақиқлаши мумкин — Bloomberg

Европа Иттифоқи Россия нефтидан бутунлай воз кечиш мажбуриятини олтинчи санкциялар пакетига киритишни режалаштирмоқда. Бу ҳақда Bloomberg манбаларга таяниб ёзмоқда.

Тахминларга кўра, нефть харидини тақиқлаш йил охирида кучга киради ва унга қадар чекловлар босқичма-босқич жорий этилади.

Бундан ташқари, агентлик маълумотларига кўра, янги санкциялар пакети доирасида яна бир қанча Россия банклари, жумладан, «Сбер» ҳам SWIFT’дан узилади. Европа Иттифоқи шунингдек, булутли сервисларнинг ишлашини ва россияликларнинг кўчмас мулк сотиб олишини чеклаши мумкин.

Олтинчи санкциялар пакети келаси ҳафтада Европа Иттифоқига аъзо давлатларнинг доимий вакиллари йиғилишидан сўнг келишиб олиниши кутилмоқда.

Санкцияларнинг янги пакети Россия нефтидан воз кечишни ўз ичига олиши мумкинлиги ҳақида 29 апрель куни The New York Times ҳам манбаларга таянган ҳолда хабар берганди. Аввал Брюссель Россиядан кўмир олиб кирилишига эмбарго жорий қилганди.

Европа Иттифоқи Россия нефтининг энг йирик импортчиси ҳисобланади. 2019 йилда Европа Иттифоқи импорт қилган хом нефтнинг деярли учдан икки қисми Россиядан олинган.

Аввалроқ Австрия Россия нефтидан бутунлай воз кечган эди. Шунингдек, Германия 2022 йил охирида Россиядан нефть импортини тўлиқ тўхтатишни мақсад қилган.