Қозоғистон президенти Қосим-Жўмарт Тўқаев 29 апрель кунги Қозоғистон халқи ассамблеяси сессиясида мамлакат конституциясига ўзгартиришлар киритиш масаласи бўйича референдум ўтказишни таклиф қилди.
«Конституцияни умумхалқ овоз бериш йўли билан ўзгартириш халқ хоҳишининг яққол намойиши бўлишига ишончим комил», — деди Тўқаев.
Унинг таъкидлашича, «референдум ҳар бир фуқарога мамлакат тақдирини ҳал қилишда бевосита иштирок этиш имконини беради ва ҳар томонлама демократлаштириш ҳамда янги Қозоғистонни барпо этиш йўлини мустаҳкамлайди».
Қозоғистон президенти референдум энг муҳим демократик институт эканини, бироқ Қозоғистонда у охирги марта 1995 йилда, амалдаги конституция тасдиқланган пайтда ўтказилганини эслатди.
«Мен конституцияга фундаментал хусусиятга эга бўлган ва мамлакат сиёсий тизимини тубдан ўзгартирадиган ўзгартиришлар киритиш ташаббуси билан чиқдим. Биз янги давлат моделига, давлат ва жамият ўртасидаги ҳамкорликнинг янги форматига ўтмоқдамиз. Бундай ўтишни иккинчи республика деб атаса ҳам бўлади», — деб тушунтирди давлат раҳбари.
Унинг сўзларига кўра, ишчи гуруҳ асосий қонуннинг 33 моддасига – бутун конституциянинг учдан бир қисмига ўзгартиришлар тайёрлаган. Мазкур ўзгартиришларни киритиш тўғрисидаги қонун лойиҳаси Конституциявий кенгашга тақдим этилган, у тез орада ўз ҳукмини чиқаради.
Қайд этилишича, Қозоғистон Конституциясига киритиладиган ўзгартишлар президентнинг ваколатларини қисқартириш, парламент ва маҳаллий вакиллик органларининг ролини сезиларли даражада кучайтиришни назарда тутади
Эслатиб ўтамиз, январь охирларида Қосим-Жўмарт Тўқаев президент лавозимда икки муддатдан ортиқ қолиш нияти йўқлигини маълум қилган. «Қанча вақт Қозоғистон президенти бўлишимни билмайман, лекин бир нарса аниқки, Конституцияга мувофиқ икки муддатдан ортиқ (президент — таҳ.) бўлмайман. Яъни қонунлар, айниқса, Конституция қайта ёзилмайди», — деганди у.
26 апрель куни Тўқаев мамлакатдаги ҳукмрон Amanat (собиқ Нур Отан) партияси раислигидан кетди.
Изоҳ (0)