«Манчестер Юнайтед»нинг АПЛдаги сўнгги 9 голидан 8 тасига Криштиану Роналду муаллиф бўлди

«Манчестер Юнайтед» ҳужумчиси Криштиану Роналду АПЛнинг 37-туридан ўрин олган ўйинда «Челси» дарвозасига битта гол урди.

Португалиялик ҳужумчи Премьер Лига жорий мавсумидаги голлари сонини 17 тага етказди ва тўпурарлар баҳсида «Тоттенҳэм» ҳужумчиси Сон Ҳён Мин билан бирга 2-ўринни эгаллаб турибди. «Ливерпуль» футболчиси Муҳаммад Салоҳ эса 22 та тўп билан тўпурарлар рўйхатида етакчилик қилмоқда.

37 ёшли футболчи манкунианликларнинг сўнгги 3 ўйинида 5 та гол урди. Роналду аввалроқ «Норвич»га қарши ўйинда (3:2) ҳет-трик қайд этган бўлса, «Арсенал»га қарши баҳсда (1:3) ҳам ўз ҳисобига гол ёздириб қўйган эди.

Криштиану «Манчестер Юнайтед»нинг сўнгги 9 та голидан 8 тасига муаллифлик қилди. 12 мартдан буён португалиялик футболчи «Тоттенҳэм» (3:2) ва «Норвич» (3:2) дарвозасига 3 тадан гол урди, «Арсенал»га (1:3) қарши ўйинда ҳам рақиб дарвозасини ишғол қилди. «Лестер»га (1:1) қарши баҳсда эса Фред Манчестер клубининг голига муаллиф бўлганди.

Шу вақт давомида «қизил иблислар» «Атлетико» (0:1), «Эвертон» (0:1) ва «Ливерпуль»га (0:4) қарши ўйинларда гол ура олмади.