“Manchester Yunayted” hujumchisi Krishtianu Ronaldu APLning 37-turidan o‘rin olgan o‘yinda “Chelsi” darvozasiga bitta gol urdi.
Portugaliyalik hujumchi Premyer Liga joriy mavsumidagi gollari sonini 17 taga yetkazdi va to‘purarlar bahsida “Tottenhem” hujumchisi Son Hyon Min bilan birga 2-o‘rinni egallab turibdi. “Liverpul” futbolchisi Muhammad Saloh esa 22 ta to‘p bilan to‘purarlar ro‘yxatida yetakchilik qilmoqda.
37 yoshli futbolchi mankunianliklarning so‘nggi 3 o‘yinida 5 ta gol urdi. Ronaldu avvalroq “Norvich”ga qarshi o‘yinda (3:2) het-trik qayd etgan bo‘lsa, “Arsenal”ga qarshi bahsda (1:3) ham o‘z hisobiga gol yozdirib qo‘ygan edi.
Krishtianu “Manchester Yunayted”ning so‘nggi 9 ta golidan 8 tasiga mualliflik qildi. 12-martdan buyon portugaliyalik futbolchi “Tottenhem” (3:2) va “Norvich” (3:2) darvozasiga 3 tadan gol urdi, “Arsenal”ga (1:3) qarshi o‘yinda ham raqib darvozasini ishg‘ol qildi. “Lester”ga (1:1) qarshi bahsda esa Fred Manchester klubining goliga muallif bo‘lgandi.
Shu vaqt davomida “qizil iblislar” “Atletiko” (0:1), “Everton” (0:1) va “Liverpul”ga (0:4) qarshi o‘yinlarda gol ura olmadi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)