Қашқадарё тоғларида «Қизил китоб»га киритилган қўнғир айиқ ва унинг икки боласи аҳоли томондан суратга туширилгани ҳақида хабар берилганди. Кейинроқ топилган қўнғир айиқ болаларидан бири ўлдирилгани маълум бўлди. Давлат экология қўмитасига кўра, ушбу айиқ боласи билан боғлиқ ҳолат юзасидан тўпланган ҳужжатлар Ички ишлар органига ўтказилган.
Аввалроқ Давлат экология қўмитаси инспекторлари ва туман ИИБ ходимлари билан биргаликда олиб борилган тезкор қидирув натижасида гумондор шахс Деҳқонобод тумани «Оққишлоқ» МФЙ, «Қизилсой» қишлоғида яшовчи фуқаро К.Ш. экани аниқланган ва унинг хонадони текширилганида бир дона айиқ боласининг териси топилганди.
Айиқ боласи териси далолатнома асосида олиб қўйилиб экспертизага юборилган. Ҳолатдан хабардор бўлган барча фуқаролардан ёзма тушунтириш хатлари олинган.
Юқоридаги ҳолат билан «Экологик назорат тўғрисида»ги, «Табиатни муҳофаза қилиш тўғрисида»ги, «Ҳайвонот дунёсини муҳофаза қилиш ва ундан фойдаланиш тўғрисида»ги ҳамда «Муҳофаза этиладиган табиий ҳудудлар тўғрисида»ги қонунлар талаблари қўпол равишда бузилиб, Жиноят кодексининг 202-моддасида (ҳайвонот ёки ўсимлик дунёсидан фойдаланиш тартибини бузиш) назарда тутилган жиноят аломатлари борлиги сабабли, тўпланган ҳужжатлар Деҳқонобод туман Ички ишлар бўлимига ўтказилган.
Ҳайвонот дунёси мониторингини ўтказиш натижаларига кўра, Ўзбекистонда 600 га яқин қўнғир айиқ аниқланган бўлиб, кейинги йилларда икки баравар кўпайган. Ҳозирда Ҳисор қўриқхонасида айиқлар сони 147 бошни ташкил этади.
Изоҳ (0)