27 апрель куни Тошкент шаҳар ҳокими Жаҳонгир Ортиқхўжаев Санкт-Петербург Ташқи алоқалар бўйича қўмитаси раиси Евгений Григорев бошчилигидаги делегацияни қабул қилди. Бу ҳақда пойтахт ҳокимлиги матбуот хизмати хабар берди.
Учрашув 15—16 сентябрь кунлари Самарқандда ўтказилиши режалаштирилган ШҲТ саммитидан кейин Санкт-Петербург губернатори Александр Бегловнинг Тошкентга ташрифига тайёргарлик кўришга бағишланган. Евгений Григорев Иккинчи жаҳон уруши йилларида Ленинград блокадаси қурбонларига бошпана берган тошкентликларга ёдгорлик ўрнатишга ажратилган жой ҳамда самимий қабул учун ҳокимга миннатдорлик билдирган.
Сўнгра Санкт-Петербург губернаторининг режалаштирилган ташрифи кун тартибига киритиш учун турли таклифлар кўриб чиқилган:
- Берёзин номидаги Тиббиёт институтининг Даволаш-диагностика марказида онкологияга чалинган болаларни даволаш фондини ташкил этиш, шунингдек, эрта туғилган чақалоқларда кўрликни даволаш учун Санкт-Петербург шифокорларининг ижобий тажрибасидан фойдаланиш;
- Иқтисодий алоқаларни ривожлантиришни рағбатлантириш учун Тошкент ва Санкт-Петербург аҳолисидан иборат потенциал сайёҳларга ҳар икки шаҳар ҳақида тақдимот видеороликларини тайёрлаш;
- Ленинград блокадасидан азият чекканларга бошпана берган ўзбекларга бағишланган ёдгорликнинг тамал тошини тантанали равишда қўйиш. Ёдгорликни ўрнатилган жойи билан боғлаш ва Санкт-Петербург меъморлари уни миллий анъаналарни ҳисобга олган ҳолда лойиҳалаши учун тошкентлик архитекторларни жалб қилиш;
- Тошкент шаҳридаги Санкт-Петербург савдо уйи ва Санкт-Петербург шаҳридаги Тошкент савдо уйини ер майдонини ажратиб бериш билан паритет асосда қуриш;
- Нуфузли халқаро ва бизнес объектлари учун экологик тоза мебель ишлаб чиқариш ва офис дизайнини ривожлантиришни қўллаб-қувватлаш. Пахтадан газлама ва ип-калава ишлаб чиқариш кластерини ривожлантиришга кўмаклашиш.
- Санкт-Петербург Жисмоний тарбия университетидан маҳаллий мураббийларга спортнинг 59 тури бўйича соҳадаги энг сўнгги илмий ишланмалар асосида малака ошириш учун таклифнома. Ҳокимлик мунтазам равишда 10-20 нафар мураббийни ўқишга юбориш ниятида;
- Ўзбекистонни Санкт-Петербургда яратилаётган йирик логистика маркази лойиҳасида иштирок этишга таклиф қилиш;
- «Водоканал Санкт-Петербурга» давлат унитар корхонасининг оқава сувларни тозалаш бўйича мутахассисларидан тажриба алмашиш учун таклифнома.
Маълумот учун, Ленинград қамали пайтида урушдан, совуқдан ва очликдан 420 минг нафар аҳоли вафот этган, шулардан 7 минг нафари ўзбекистонлик аскарлар бўлган ва улар хотирасига Санкт-Петербург шаҳридаги Пскаревский қабристонида ёдгорлик ўрнатилган.
Изоҳ (0)