Poco компанияси ўзининг биринчи «ақлли» соати ва геймерлар учун Buds Pro наушникларини тақдим этди

Poco компанияси ажойиб техник тавсифга эга ҳамёнбоп Poco Watch «ақлли» соатларини тақдим этди, деб хабар беради GSMArena.

Смарт-соат пикселлар нисбати 360х320 бўлган 1,6 дюймли АМOLED-дисплейга эга бўлди. Корпус енгил пластикдан ишланган, девайс оғирлиги — 31 грамм. Соатлар намликдан қўрқмайди, бироқ ювинишдан олдин уни ечиб қўйиш тавсия этилади — улар 5 АТМ бўйича намликдан ҳимояланган.

Смарт-соатларда функциялар жамланмаси стандарт: пулсометр, қондаги кислород миқдорини кўрсатувчи монитор ва 100 дан ортиқ машғулот режимлари. Шунингдек, ички GPS ҳам мавжуд. Poco’нинг маълум қилишича, «ақлли» соатлар бир марта қувватланиш орқали 14 кунгача ишлай олади.

29 апрелдан Алиэхпресс ва бошқа онлайн-платформалар орқали сотувга чиқадиган соат нархи 80 еврони ташкил этади.

Poco Watch’дан ташқари, яна бир аксессуар — Buds Pro Генсин Impact наушниклари тақдим этилган. У Poco’нинг машҳур ўйин билан ҳамкорлиги маҳсули ҳисобланади.

Наушниклар тилла рангли ҳошияга эга қизил рангли ғилофи билан ажралиб туради. Бундан ташқари, девайснинг айрим қисмларида кичкина ихчам тўрт барли беда расмини кўриш мумкин — бу Genshin Impact ўйинига ишора.

Техник жиҳатдан у стандарт моделдан фарқ қилмайди: наушниклар Bluetooth 5.2 ёрдамида иккита қурилмага улана олади. Шунингдек, фаол шовқин сўндирувчи функцияга эга. Бир марта қувватланиш орқали 28 соат автоном ишлай олади. Poco Buds Pro Genshin Impact нархи 70 еврони ташкил этади.

Эслатиб ўтамиз, 2021 йилнинг майида Xiaomi 5G алоқа тармоғини қўллаб-қувватловчи ҳамёнбоп Poco М3 Про смартфонини тақдим этганди.