БМТ бош котиби Антониу Гутерриш 26 апрель куни Кремлда Россия президенти Владимир Путин билан учрашиб, Украинадаги урушни муҳокама қилди. Учрашувда Гутерриш Россиянинг «Украинада содир бўлаётган воқеаларга, шунингдек, Европа ва глобал хавфсизликка нисбатан» даъволарини тушунишини, аммо БМТ Москванинг ҳаракатларини босқинчилик деб билишини таъкидлади. Путин бу сафар ҳам музокараларни тўрт метрлик стол атрофида ўтказган.
Февраль бошида, Россиянинг Украинага босқини бошланишидан аввал Путин ва Франция президенти Эммануэль Макроннинг Кремлдаги учрашуви ушбу стол атрофида бўлиб ўтганди. Ўшанда Путин ва Макроннинг 4 метрлик стол атрофида ўтириши ижтимоий тармоқларда кўплаб ҳазил ва мемларга сабаб бўлган. Етакчиларнинг бундай узоқ масофа сақлашига Макроннинг Россияда коронавирусга ПЗР-тестини топширишдан бош тортгани сабаб қилиб кўрсатилган.
БМТ бош котиби Россияга келишидан аввал Туркияда бўлган ва мамлакат раҳбари Ражаб Тоййиб Эрдўғон билан учрашган. 28 апрель куни БМТ бош котибининг Киевда Владимир Зеленский билан учрашуви режалаштирилган. Гутерришнинг ўзи аввалроқ Путин ва Зеленскийдан «тинчлик ўрнатиш бўйича шошилинч қадамлар»ни муҳокама қилиш учун унга мезбонлик қилишларини сўраган эди.
Путин билан учрашувда Гутерриш Мариуполдаги «Азовсталь» ҳудудидан тинч аҳолини эвакуация қилиш учун БМТ, Россия ва Украина вакилларидан иборат қўшма гуруҳ тузишни таклиф қилган.
БМТ бош котиби сайтига жойланган хабарга кўра, Путин Гутерришнинг таклифига розилик берган.
Изоҳ (0)