АҚШ давлат котиби Энтони Блинкен мамлакатнинг Россия энергия соҳасига нисбатан келгусида ёқилғи нархининг кескин ошиб кетишига сабаб бўладиган санкцияларни қўлламоқчи эмаслигини маълум қилди. Сиёсатчи бу ҳақда АҚШ конгрессининг хориж ишлари қўмитасидаги эшитувлар давомида айтиб ўтган. Блинкеннинг баёноти АҚШ давлат департаментининг расмий YouTube-каналига жойлаштирилган.
«Биз бундай санкциялар сиёсати ортидан қувмаслигимиз, яъни бензин нархи яна осмонга кўтарилишига йўл қўймаслигимиз керак», — дея тушунтирган Блинкен.
Унинг қўшимча қилишича, Россия энергетикаси нисбатан радикал чекловларни қўллашдан воз кечиш Москвага нисбатан санкциялар босимининг камайишини англатмайди.
«Ҳозир бизнинг асосий мақсадимиз нафақат санкцияларни сақлаб қолиш, балки уларнинг миқёсини янада кенгайтиришдан иборат. Биз бу ишни қилишимиз зарур деб ҳисоблайман», — деган АҚШ давлат котиби.
Шунингдек, Блинкен дунё ҳамжамиятининг Россияга қарши санкциялар қўллашдаги ҳамфикрлиги ҳақида гапирган ва Украинага ёрдам кўрсатиш, Европадаги иттифоқчиларнинг Россияга қарши курашда фаол бўлиши заруриятига тўхталган.
Март бошида Россия энергия ресурсларига нисбатан қўлланган чекловлардан кейин АҚШда нефть маҳсулотларининг чакана нархи рекорд даражада ўсган. ABC News/Ipsos сўровномасига кўра, америкаликларнинг ярми нарх-навонинг ошиши туфайли молиявий қийинчиликларни бошидан ўтказмоқда.
Изоҳ (0)