Эстония Солиқ-божхона департаменти (SBD) мамлакатнинг Мууга портида Россияга юбориш учун мўлжалланган 3,5 тонна кокаинни мусодара қилди. Бу ҳақда Эстония Давлат прокуратурасига таяниб, ERR хабар берди.
Гиёҳвандлик моддаларининг йирик партияси 5 март куни Роттердам портидан чиққан Мilan Express кемасини текшириш давомида топилган. «Кема юки контейнерлардан иборат бўлиб, уларнинг аксарияти Россияга етказилиши керак бўлган», — дейди SBD гиёҳванд моддаларга қарши курашиш бўлими бошлиғи Рауль Коппелмаа.
Эстониялик божхоначилар Финляндия божхона хизмати ва Нидерландия полициясидан «тегишли сингаллар олиниши билан» текширув ўтказишга қарор қилган. Идора маълумотларига кўра, ҳужжатлар бўйича Эквадордан банан ортилгани айтилган рефрижератор контейнерларида 72 та қора қоп топилган. Уларнинг ичида 3 мингдан ортиқ елим идишда оқ кукун бўлган. Экспресс-тест у кокаин эканини кўрсатган.
Идора маълумотларига кўра, бу Болтиқ ва Шимолий Европа давлатлари ҳудудида мусодара қилинган энг йирик партиядаги кокаин ҳисобланади. Прокуратура унинг бозор қийматини 500 миллион еврога баҳолаган.
«SBD ушбу ишга алоқадор жиноятчиларни аниқлаш бўйича халқаро полиция билан, жумладан Нидерландия полицияси, Финляндия божхона хизмати ва ‘Европол’ билан яқиндан ҳамкорлик қилмоқда», — дейди Коппелмаа.
Аввалроқ Ливияда қадоғига Владимир Путин портрети туширилган катта миқдордаги гиёҳванд моддалар ушлаб қолингани тўғрисида хабар берилганди.
Изоҳ (0)