“Tottenhem” bosh murabbiyi Antonio Konte faoliyatini “PSJ”da davom ettirishi mumkin.
Jurnalist Abdulla Bulmaning xabar berishicha, italiyalik mutaxassis “PSJ” rahbariyatiga Maurisio Pochettinoning o‘rnini egallashga tayyorligini bildirgan.
Konte parijliklar oldiga bir nechta shartlar qo‘ygan. U klubdagi transfer siyosatini to‘liq nazorat qilishni, “Roma” va “Torino”da sport direktori lavozimida ishlagan Janluka Petrakini olib kelinishini xohlamoqda. Undan tashqari Konte o‘zi bilan birga murabbiylar shtabini ham olib kelmoqchi.
Italiyalik murabbiy parijliklar bilan 2 yillik shartnoma imzolashni istamoqda.
“PSJ” rahbariyati Pochettinoning ishlaridan norozi. 49 yoshli mutaxassis qo‘l ostida jamoa Fransiya Kubogi nimchorak finalida “Nitssa”ga imkoniyatni boy berib, musobaqa bilan xayrlashdi, Chempionlar Ligasi 1/8 finalida esa “Real”ga mag‘lub bo‘ldi.
Avvalroq, “PSJ” Pochettinoning o‘rniga Diyego Simeoneni olib kelmoqchi ekanligini xabar qilingandi. Shuningdek, “Real” sobiq ustozi Zinedin Zidan ham Parij klubida ish boshlashi mumkinligi aytilgandi.
Eslatib o‘tamiz, “PSJ” Fransiya chempionatining 34-turiga kelib, chempionlikni muddatidan avval hal qilib qo‘ydi.
Izoh (0)