FТ: Путин Киев билан тинчлик шартномаси тузишга қизиқишини йўқотган, энди у Украинанинг имкон қадар кўпроқ ҳудудини эгалламоқчи

Россия президенти Владимир Путин Украинадаги можарони дипломатик йўл билан ҳал қилишга қизиқишини йўқотган ва бунинг ўрнига афтидан, иложи борича Украинанинг каттароқ ҳудудини эгаллаб олмоқчи. Бу ҳақда Россия президентининг режалари билан таниш бўлган уч манбага таяниб, Financial Times газетаси ёзмоқда.

Нашр манбаларига кўра, уруш бошида Россия армиясининг муваффақиятсизликларидан сўнг Путин тинч йўл билан келишув имкониятини жиддий ўйлаб кўраётган эди, бироқ ҳозир у бунинг истиқболини кўрмаяпти.

«Москва» крейсерининг йўқ қилиниши ҳам Россия президентининг позициясига таъсир қилган: бу унинг ғазабини қўзғатди, дейди FТ’га икки суҳбатдош. «Москваъдан кейин у ғолибдек кўринмай қолди, чунки бу ҳақоратомуз эди», — деди манбалардан бири.

Нашр суҳбатдошларининг таъкидлашича, Россия қўмондонлиги ва давлат телевидениеси хабарлари Путинда урушнинг бориши ҳақида янглиш тасаввур яратаётган бўлиши мумкин: суҳбатларда у гўёки Россия кучлари ҳарбий ҳаракатлар давомида, хусусан, Мариуполдаги «Азовсталь»ни қамал қилиш пайтида тинч аҳолига зарба бермаганини таъкидлаган. «Путин чиндан ҳам телевизорда эшитган бемаъни гапларига ишонади, у йирик ғалаба қозонишни хоҳлайди», — деди FТ манбаларидан бири.

Газетанинг ёзишича, 22 апрель куни Европа кенгаши президенти Шарл Мишел билан телефон орқали суҳбатда Путин музокаралар боши берк кўчага кирганини айтиб, Украинани дипломатик йўлда «девор ўрнатаётганликда» айблаган ва ҳозир Украина президенти Владимир Зеленский билан учрашиш вақти эмаслигини таъкидлаган. Музокарачилар бундан Россиянинг ҳаракатлари дипломатларга келишувга эришиш учун вақт бериш эмас, балки кўпроқ ҳудудни эгаллашга қаратилган, деган хулосага келди деб ёзади FТ.

Бир неча кун олдин Россия Мудофаа вазирлиги Украинада «махсус операциянинг иккинчи босқичи» бошланганини эълон қилди. 22 апрель куни Марказий ҳарбий округ қўмондони вазифасини бажарувчи Рустам Миннекаев бу босқичдан мақсад Донбасс ва Украина жанубида тўлиқ назорат ўрнатиш ва Қримга қуруқлик йўлагини очиш эканини айтди. Бунгача Россия қўмондонлиги вакиллари бундай мақсадларни ошкора эълон қилмаган эди.