АҚШ давлат котиби Энтони Блинкен ва мудофаа вазири Ллойд Остин Киевга ташрифи чоғида америкалик дипломатларни Украинага қайтаришга ва яна ҳарбий ёрдам юборишга ваъда берди, деб хабар бермоқда Reuters.
Блинкен ва Остин 23 апрель куни Польшага, 24 апрель куни Украинага бориб, у ерда президент Владимир Зеленский билан учрашди, дейди Давлат департаментининг юқори мартабали расмийси. Давлат департаменти ва Пентагон раҳбарлари Зеленскийга мудофаа учун яна 322 миллион доллардан кўпроқ пул ваъда қилган.
Бундан ташқари, келаси ҳафтадан америкалик дипломатлар Львовга «кунлик сафарлари»ни давом эттиради. Дипломатик миссия вакиллари Россиянинг ҳарбий амалиёти бошланишидан олдин Киевдаги элчихонани тарк этишган: улар аввал Львовга, кейин Польшага кўчиб ўтганди, деб эслатди Reuters.
Агентлик суҳбатдошига кўра, 25 апрель, душанба куни президент Жо Байден АҚШнинг Словакиядаги элчиси Бриджит Бринк номзодини Украинадаги дипломатик миссия раҳбари лавозимига таклиф қилмоқчи. Америка етакчиси Бринк номзодини танлагани ҳақида аввалроқ CNN ва Bloomberg хабар берганди. Украинадаги АҚШ элчиси лавозими 2019 йилнинг май ойидан бери бўш қолмоқда, унинг вазифаларини вақтинчалик вакил бажаради.
Блинкен ва Остиннинг Украинага келиши америкалик юқори мартабали мулозимларнинг уруш бошланганидан бери бу мамлакатга биринчи ташрифидир. Уларнинг Зеленский билан учрашуви Байден маъмурияти Украинага тактик дронлар, гаубицалар ва артиллерия снарядларини ўз ичига олган янги 800 миллион долларлик ҳарбий ёрдам пакети берилишини эълон қилганидан бир неча кун ўтиб амалга оширилди. Пентагон маълумотларига кўра, икки ой давомида Вашингтон Киевга хавфсизлик бўйича тахминан 3,4 миллиард долларлик ёрдам кўрсатган.
Зеленский 23 апрель куни Остин ва Блинкеннинг Киевга ташрифи ҳақида маълум қилганди. Байден ҳам Украинага келишга тайёрлигини билдирган.
Апрель ойида Еврокомиссия раҳбари Урсула фон дер Леен, Европа Иттифоқи дипломатияси раҳбари Жозеп Боррел ва Австрия канцлери Карл Нехаммер Киевга ташриф буюрган эди. Шунингдек, Буюк Британия бош вазири Борис Жонсон, Польша, Латвия, Литва ва Эстония президентлари Анжей Дуда, Эгилс Левиц, Гитанас Науседа ва Алар Карис Украинага келган. Апрель охирида БМТ Бош котиби Антониу Гутерриш аввалига Москвага, сўнг Украина пойтахтига келади.
Изоҳ (0)