Ижтимоий тармоқларда Тошкент вилоятининг Ангрен шаҳрида ҳайдовчи ва ЙПХ ходими ўртасида жанжал содир бўлгани тасвирланган видео тарқалди. ИИВ ЙҲХХ ҳолатга муносабат билдириб, ҳозирда шаҳар прокуратураси томонидан суриштирув ишлари олиб борилаётганини маълум қилди.
Маълум қилинишича, 23 апрель куни соат 09:40 ларда Ангрен шаҳри Амир Темур кўчасида хизмат олиб борган ЙПХ ходими Х.Раҳмонов томонидан меъёрий ҳужжатларини текшириш мақсадида Matiz русумли автомобиль ҳайдовчиси тўхтатилган. Текширув давомида ҳайдовчида ҳайдовчилик гувоҳномаси ва ушбу автомобилдан фойдаланиш учун ишончнома йўқлиги маълум бўлган. Қоидабузарлик ҳолати ЙПХ ходими томонидан тегишли тартибда расмийлаштирилаётган вақтда 24 ёшли ҳайдовчи С.Н. унга нисбатан қонуний чора кўрилишини пайқагач, ходимга қаршилик кўрсата бошлаган.
ЙПХ ходими яқин атрофда бўлган ҳамкасбларидан амалий ёрдам сўраган. Воқеа жойига ўзини ҳайдовчининг акаси Сардор дея таништирган фуқаро ҳам етиб келиб, ходимларга фаол қаршилик кўрсатиб, зиддиятли вазиятни юзага келтирган.
ЙПХ ходими томонидан ҳолат бўйича Маъмурий жавобгарлик тўғрисидаги кодекснинг 135-, 194- ҳамда 195-моддалари тартибида баённома расмийлаштирилган ва ушбу фуқаролар Ангрен шаҳар ИИБга топширилган.
Matiz русумли автомобиль вақтинча сақлаш учун жарима майдонига қўйилган. Шунингдек, ҳозирда ушбу ҳолат бўйича Ангрен шаҳар прокуратураси ходимлари томонидан суриштирув олиб борилмоқда.
Аввалроқ Фарғонада маст ҳайдовчи ИИБ ходимларини ҳақорат қилиб, тан жароҳат етказгани, Самарқандда ЙПХ инспекторига қўл кўтарган шахсга нисбатан жиноят иши қўзғатилиб, қамоққа олингани, Наманганда ЙПХ ходими ва ниқобли шахс фуқароларга электрошокер ишлатгани тўғрисида хабар берилганди.
Изоҳ (0)