Россия Мудофаа вазирлиги 13 апрель куни «Москва» ракета крейсерида юз берган ёнғинда бир нафар одам ҳалок бўлгани, 27 киши бедарак йўқолганини хабар қилди, деб ёзмоқда «Интерфекс».
«Кемадаги ёнғинни ўчириш учун ҳаракатлар вақтида бир нафар ҳарбий ҳалок бўлди, экипажнинг яна 27 аъзоси бедарак йўқолди. Қолган 396 нафар ҳарбий эвакуация қилиниб, Қора денгиз флотидаги крейсердан Севастополга олиб келинган», — дейилади вазирлик баёнотида.
«Москва» крейсеридаги ҳалокат оқибатида катта мичман Иван Вахрушев ҳалок бўлди, дея баёнот берган Севастопол губернатори Михаил Развокаев. Аввалроқ Вахрушевнинг рафиқаси ҳам турмуш ўртоғининг ҳалок бўлганини маълум қилганди.
Дастлаб Россия Мудофаа вазирлиги ёнғиндан кейин кемадаги экипаж аъзоларининг ҳаммаси эвакуация қилинганини билдирган, аммо бу ҳалок бўлган ва бедарак йўқолган денгизчилар ҳақида тарқалган турли хабарларга зид келади.
Россия Мудофаа вазирлиги баёнотига кўра, 13 апрелда Қора денгиз флотидаги флагманда ўқ дорилар портлаши оқибатида кучли ёнғин содир бўлган. Бир суткадан кейин вазирлик кеманинг чўкиб кетганини хабар қилди. Украина манбалари «Москва» крейсери Киевнинг «Нептун» ракетаси кемага келиб урилиши оқибатида ҳалокатга учраганини билдирган.
Изоҳ (0)