Меган Маркл Британия қироллик оиласидаги ирқчилик ҳақида гапириб, шов-шувга сабаб бўлган интервьюсидан кейин илк бор қиролича Елизавета II билан учрашди

Шаҳзода Гарри ва рафиқаси Меган Маркл Буюк Британияга учиб келди ҳамда қиролича Елизавета II ва шаҳзода Чарльз билан учрашди, деб хабар бермоқда ITV.

14 апрель куни Гарри ва Меганни Виндзор қасридаги Авлиё Георгия ибодатхонасига кетаётганида кўришган, дейилади хабарда. Сассекс герцоги ва герцогинясининг матбуот котиби BBC News'га улар қиролича билан учрашганини тасдиқлаган. Жуфтлик Нидерландияда ўтказиладиган Invictus Games (Имконияти чекланган ҳарбийлар ўртасида халқаро кўп тармоқли мусобақалар. Улар 2014 йилдан бери шаҳзода Гарри ташаббуси билан ўтказилади) мусобақаларига кетаётган пайтда Буюк Британияда тўхтаб ўтган.

Шу тариқа Шаҳзода Гарри ва Меган Маркл 2020 йил март ойида қироллик аъзолигидан воз кечиб, Канадага, кейин эса АҚШга кўчиб ўтгандан кейин Буюк Британияга биринчи марта биргаликда ташриф буюрди. Шаҳзода Гарри Буюк Британияга 2021 йилнинг июль ойида келган, унинг рафиқаси эса келмаган.

ITV таъкидлашича, бу Меганнинг 2021 йил март ойида америкалик телебошловчи Опра Уинфрига қироллик оиласидаги ирқчилик ҳақида гапирган интервьюсидан кейин биринчи марта қиролича Елизавета II билан учрашиши. Интервьюда Меган Марклнинг қироллик оиласи аъзоларидан бири уларнинг ўғли Арчининг танаси қанчалик қора бўлишидан хавотир билдирганини айтганди (аниқ кимлиги айтилмаган, аммо бу Елизавета II эмаслиги таъкидланган).

Ирқчилик суҳбатда кўтарилган энг жиддий масалалардан бири бўлганди. Шаҳзода Гаррининг укаси шаҳзода Уильям Британия қироллик оиласи «ирқчи эмас» деб ишонтирди. Суҳбатдан сўнг Букингем саройи қироллик оиласининг барча қароргоҳларида хилма-хиллик сиёсатини қайта кўриб чиқишга қарор қилди.