Andijon viloyatining Shahrixon tumanidagi 64-ixtisoslashtirilgan davlat umumta’lim maktabining tarix fani o‘qituvchisi ushbu muassasaning 10-sinf o‘quvchisi A.I.ni kaltaklagani haqida xabar tarqaldi. Voqea tafsilotini o‘rgangan “Daryo” muxbiri bilan suhbatlashganlarning aytishicha, bunga o‘quvchining sinfdosh qiz rasmini internetda tarqatgani sabab bo‘lgan.
O‘quvchini kaltaklagan o‘qituvchining aytishicha, unda bolani tartibga chaqirib qo‘yish istagi bo‘lgan va u bilan suhbat o‘tkazgan. Ammo o‘quvchining gap qaytarishi ortidan jahli chiqib, o‘zini ushlab turolmagan.
“Bu o‘quvchi bilan bunday vaziyat yuzaga kelishi birinchi marotaba emas, bu avval ham bo‘lgan. O‘zi maktabga kam keladi. Oldinlari ham u bilan shunga o‘xshash muammolar bo‘lgan-da, o‘qituvchilar tomonidan tartibga chaqirilgan edi. Avvalroq hamkasbimizning qizi surati ham ijtimoiy tarmoqlarda tarqatilgani, bu holatdan qizning ahvoli yomonlashgani, sinfdoshlari orasida turli gap-so‘zlarga qolgani, ayolning o‘ziga ham 10-sinf o‘quvchilari ‘internetga kirmayapsizmi, kirsangiz qizingizning rasmlarini ko‘rib olasiz’, deya piching ham qilishganini eshitgandim. Avvaliga o‘qituvchiga bunday gaplarni aytayotgan bolani tartibga chaqirib qo‘ymoqchi bo‘ldim. Keyin o‘zimga ham bir necha bor gap qaytargani uchun jahlim chiqib, o‘zimni ushlab turolmasdan urib yubordim. O‘shanda xona ular aytgandek qulflanmagan edi”, — deydi o‘qituvchi.
Maktab direktorining ma’naviy-ma’rifiy ishlar bo‘yicha o‘rinbosari Anvar A’zamjonovning aytishicha, o‘quvchi va uning ota-onasi bilan olib borilgan tushuntirish ishlariga qaramasdan hech qanday natija bo‘lmagan.
“Ushbu o‘quvchimiz bilan avval ham bir necha bor tushuntirish ishlari olib borilgan. Negaki, unda ko‘p bora darslarga kech qolish yoki umuman kelmaslik, kelsa ham o‘quv qurollarini to‘liq olib kelmaslik, darsdan ketib qolish holatlari kuzatilgan. O‘quvchimizning ota-onasini ham chaqirtirib, tushuntirish ishlari olib borilganiga qaramasdan bu holatlar takrorlanib kelmoqda. Tengdoshlariga nisbatan sho‘xroq, o‘qituvchi tanbeh berganda xo‘p desa ham o‘z bilganidan qolmaydigan bola. U telefondan foydalanmaslik to‘g‘risida ham ogohlantirilgan, ammo foydasi bo‘lmagan”, — deydi Anvar A’zamjonov.
Maktabning fizika fani o‘qituvchisi Mirodil Jo‘rayevning ma’lum qilishicha, o‘quvchi maktabga haydovchilik guvohnomasisiz otasining mashinasida kelib-ketadi. Bundan tashqari maktabdagi qizlarni suratga olib sinfdosh do‘stlariga tarqatayotgani haqida ham bir necha bor shikoyatlar kelib tushgan.
“U bola haqida qisqacha aytadigan bo‘lsam, uning o‘qishlari yaxshi emas. Chunki, darslarga kirmaydi. Darsga kirishini aytgan o‘qituvchilarga qo‘pollik qiladi. Ba’zan maktabga voyaga yetmagani va haydovchilik guvohnomasi yo‘qligiga qaramay otasining mashinasini minib keladi. Biz bir necha marta maktabga mashina minib kelmasligini aytganmiz. Baribir gapimizga kirmaydi. Bundan tashqari maktabdagi qizlarni suratga olib sinfdosh-do‘stlariga tarqatayotgani haqida ham bir necha bor shikoyatlar kelib tushgan. Shundan so‘ng, ota-onasini maktabga chaqirganmiz, hatto tog‘asi ham kelgan. Ularga farzandining maktab sumkasini ham ko‘rsatganmiz. Deyarli kitoblari va daftarlari to‘liq emasligini o‘z ko‘zlari bilan ko‘rishgan. O‘g‘lining shu holatda 10-sinfda o‘qiyotgani, bunga intizomiy chora ko‘rishlari kerakligi haqida tushuntirganmiz. O‘shanda ota-onasi anchagina va’dalar berib ketgandi. Biroq vaziyat o‘zgarmadi. Oxir-oqibat shu ko‘ngilsiz voqea yuz berdi”, — deydi Mirodil Jo‘rayev.
Shu bola o‘qiyotgan sinfga vaqtincha sinfga rahbarlik vazifasini bajarayotgan Murodjon G‘ofurovning aytishicha, o‘quvchi ko‘p bora ogohlantirilgan, biroq o‘z bilganidan qolmagan.
“Bir yarim oydan beri shu sinfga vaqtincha sinf rahbarlik qilib kelyapman. Bu sinfdagi bolalar o‘ta sho‘x va betartib bo‘lib ketgani uchun sinf rahbarlikni menga berishgandi. Hattoki, sinfdagi bir necha bola o‘qishni tashlab, Toshkentga ketib yuborgan ekan. Ularni chaqirtirdim. Oradan 15-20 kunlar o‘tgach, bu o‘quvchining tog‘asi uyimga kelib, imkon bo‘lsa uni yana Toshkentga olib ketishlarini, mebel sexida ishlashi kerakligini, baribir maktabda ham o‘qimayotganini aytdi. Men esa buning imkoni yo‘qligini bildirganman. Shunda tog‘asi ‘Agar qandaydir yo‘l-yo‘riq bo‘lsa bajaramiz’, degan. Qat’iy rad javobini berganman. O‘z ko‘zim bilan ko‘rmaganman-u, lekin eshitishim bo‘yicha kechalari ichkilik ichib olib bir necha do‘stlari bilan mashina minib yurar ekan. Shaxsan o‘zim ko‘p bor ogohlantirganman. Bu yurishingni yig‘ishtir deganimda ‘Xo‘p, domla. Boshqa qaytarilmaydi’, deydi, ammo yuraveradi”, — deydi Murodjon G‘ofurov.
“Daryo” muxbiri Shahrixon tuman markaziy shifoxonasiga borib, o‘quvchi va uning onasi bilan gaplashishga uringan. Ammo o‘quvchining onasi boshqalarga intervyu berib bo‘lganligini, o‘g‘lining hali yosh ekanligini, gap so‘z bo‘lishini istamasligini aytib, savolga javob berishdan bosh tortgan.
Viloyat xalq ta’limi boshqarmasi axborot xizmatining ma’lum qilishicha, holat maktabning pedagogik jamoasi ishtirokida o‘rganib chiqilgan. O‘rganish yakunlari bo‘yicha o‘qituvchiga intizomiy jazo chorasi qo‘llanilgan.
Izoh (0)