Шавкат Мирзиёев Қашқадарёнинг Кўкдала туманига ташрифида ўтказилган фаоллари билан учрашувда Амир Темур мудофаа мероси ҳақида гапирди, деб хабар бермоқда «Дарё» мухбири.
«Озроқ вақтим бўлса китоб ўқийман. Соҳибқирон Амир Темурнинг Тўхтамишхоннинг жанги ҳақида ўқиб чиқдим. Амир Темур бу жангда еттита усулни қўллаган экан. Жасорати, ўз аскарларини мардонавор тарбиялаши билан бирга, жангларни ҳам ўзи бошқарган. Ўзим учун ҳам бу янгилик бўлди. Кейин кимдир шу жанг усулини ўргангани билан қизиқиб кўрдим. Ҳеч ким ўрганмаган экан. Энг аввало боболаримизнинг усулларини ўрганишимиз керак», — деди президент ва соҳибқироннинг жанговар меросини чуқур ўрганиш бўйича топшириқ берганини айтди.
Эслатиб ўтамиз, Шавкат Мирзиёев ҳудудлар иқтисодиёти, аҳоли турмуш шароитлари билан танишиш мақсадида Қашқадарё вилоятига етиб келди ва ташрифни Кўкдала туманидан бошлади. Президент туман фаоллари билан учрашувда бу ҳудудда амалга оширилиши режалаштирилган ишлар борлигини таъкидлади.
Давлат раҳбари учрашув давомида Кўкдала туманида мактаб, боғча қуриш кераклиги, шунингдек, газ ва сувни олиб келиш бўйича ишлар амалга оширилиши кераклигини айтди.
Президент вилоятда икки кун — 21—22 апрель кунлари бўлади. Ташриф доирасида президент кластер ва саноат корхоналарида, фермер хўжалиги даласида бўлади, бунёдкорлик ишлари, маҳаллалардаги ўзгаришлар билан танишади, қишлоқ хўжалиги ва саноат лойиҳалари тақдимоти ўтказилади.
Изоҳ (0)