Германия 2022 йил охирида Россиядан нефть импортини тўлиқ тўхтатишни мақсад қилган. Бу ҳақда мамлакат ташқи ишлар вазири Анналена Бербок маълум қилди.
Вазир Берлиннинг Россия газидан ҳам иложи борича тезроқ воз кечиши кераклигини қайд этган.
«Бу борадаги аниқ ва дангал жавобим шундай: Ҳа, Германия Россия энергия ресурслари импортидан босқичма-босқич воз кечади», — деган Бербок Литва, Латвия ҳамда Эстония ташқи ишлар вазирлари билан бирга ўтказилган қўшма матбуот анжуманида.
Германия федератив республикаси ташқи ишлар вазири мамлакатнинг ёзда нефть импортини икки баравар қисқартириши, йил охирида эса Россия нефтидан бутунлай воз кечишини ва кейинги босқич газ борасида шундай қарор қабул қилиш эканлигини таъкидлади.
«Россия газини импорт қилишни тўхтатамиз, бу ишни эртага қолдирмасдан, бугун амалга оширган яхши»,— дея қўшимча қилган дипломат.
Бербокнинг фикрича, Германия ўтмишда хатолар қилган ва энди Россия энергия ресурсларини импорт қилишдан воз кечиши лозим.
Европа иттифоқи олтинчи санкциялар пакетида Россия нефтига нисбатан чекловлар ўрнатишни муҳокама қилмоқда. Аввал Брюссель Россиядан кўмир олиб кирилишига эмбарго жорий қилганди. ЕИга аъзо бир қатор давлатлар Россиядан газ импортига чекловлар ўрнатишга қарши чиқмоқда.
Изоҳ (0)