Хитой ҳукумати АҚШдаги ижтимоий вазият тобора ёмонлашиб бораётганига эътибор қаратди, Пекин расмийларининг фикрича, инсон ҳуқуқлари йўналишидаги халқаро ҳуқуқбузарликлар мамлакатдаги тизимнинг сурункали муаммосига айланган. Бу ҳақда Хитой ташқи ишлар вазирлигининг расмий вакили Ван Венбинга таяниб, «ТАСС» хабар қилди.
Хитойлик дипломат АҚШ ҳукумати бу каби муаммоларни ҳал этиш чораларини кўриши кераклиги, мазкур масаладаги ирқчилик, жиноятчилик ва зўравонлик ҳолатлари юзасидан далиллар мавжудлигини қайд этган. Шунингдек, Ван Венбин АҚШ ҳуқуқий тизими фақат бой кишиларга хизмат қилиши ва кам таъминланганларни жазолашини таъкидлади.
«АҚШ — охирги 20 йил давомида ҳар йили ўқотар қуролдан фойдаланиш билан боғлиқ кўплаб катта фавқулодда ҳодисалар юз берган ягона, ривожланган мамлакат», — дея қўшимча қилган хитойлик дипломат.
Ван Венбин зўравонлик, қонунни бузиш, америкаликлар ва хорижликларнинг оммавий ҳалок бўлишига алоқадор ҳолатлар кўп кузатилганини эслатган.
«АҚШ бошқа мамлакатларни инсон ҳуқуқларини поймол қилганликда айблашга ҳақли эмас», — дея танқидий гапларига якун ясаган Хитой ташқи ишлар вазирлигининг расмий вакили.
Эслатиб ўтамиз, АҚШ бир неча йилдан бери Хитой ҳукуматини Шинжон-Уйғур автоном вилоятида инсон ҳуқуқларини қўпол равишда бузганликда, Тайванга нисбатан мустамлака сиёсатини юритишга уринганликда айблаб келади.
Изоҳ (0)