Ошқозон ичи бўш органдир, яъни у табиий чўзилиш хусусиятга эга. Агар бўш қориннинг нормал ҳажми тахминан 500 милилитр бўлса, овқатдан кейин у 2 литргача чўзилиши мумкин. Бироқ у кун давомида тезда стандарт ўлчамларига қайтади. Агар одам мунтазам равишда ортиқча овқатланса ва доим нимадир еб юрса, унда ошқозон ҳажми аста-секин 4 литргача катталашиши мумкин. Натижада бутун ошқозон-ичак трактининг мотор-эвакуация функцияси бузилади.
Нима қилиш керак?
Аввало нафақат ошқозон ҳажмини механик равишда кичрайтириш, балки ошқозон рецепторлари аппаратининг сезгирлигини меъёрлаштириш, шунингдек, очлик, гормонал ва психологик даражада тўйинганлик ҳиссини тўғри шакллантириш ва баҳолаш муҳим. Бунинг учун бир нечта қоидаларни ёдда тутинг:
Доим нимадир еб юрманг
Барқарор овқатланиш жуда муҳим: одатда 3 та асосий таом инсон учун етарли. Шу билан бирга, шифокорингиз орада сабзавотли бульон, сметана ва бошқа енгил газакларни истеъмол қилишни тавсия қилиши мумкин.
Овқат вақтида сув ичманг
Овқатдан 30 дақиқа олдин сув ичиш фойдали, лекин овқатланаётганда ёки кейин эмас. Овқатланишдан бир соат ўтгачгина сув ичиш мумкин.
Идиш ўлчамини назорат қилинг
Ўзингиз учун маълум чегараларни белгилаш психологик жиҳатдан муҳим: агар катта идишга овқат солсангиз, уни охиригача ейишга ҳаракат қиласиз. Шунинг учун кичик идиш ва санчқи, пичоқ ишлатган маъқул.
Шошмасдан чайнанг, гаджет ва телевизорга чалғиманг
Бу маслаҳат болалигимиздан бери бекорга айтилмайди: бу мия тўйганини ҳис қилиши учун керак. Етарли миқдорда истеъмол қилинган овқат ҳақида мияга импулс ўтказиш учун масъул бўлган рецепторлар ошқозоннинг юқори қисмларида жойлашган, шунинг учун ортиқча овқатланмаслик учун сигнални ўтказиб юбормаслик керак.
Зираворлардан камроқ фойдаланинг
Биринчидан, зираворлар ошқозон шираси ишлаб чиқаришни кўпайтиради ва иштаҳани очади. Иккинчидан, ошқозон-ичак трактининг ҳаракатланишини тезлаштиради, натижада тез-тез ва кўпроқ овқатланишни хоҳлайсиз.
Аэробик машқларни бажаринг
Югуриш, сузиш, юриш ва бошқа нарсалар қондаги YY пептид даражасини фаол равишда оширади. Гипоталамусдаги мазкур гормон тўйинганлик ва иштаҳани камайтириш учун масъул бўлган нейронларни фаоллаштиради, тўйишга таъсир қилувчи нейронларни рағбатлантиради ва иштаҳани қўзғатувчи нейронларни тормозлайди. Бундан ташқари, бундай машқлар ошқозон-ичак трактининг фаоллигини яхшилайди.
Изоҳ (0)