Ўзбекистонда 2022 йил апрель ойи учун энг фойдали истеъмол кредитлари маълум бўлди

«Иқтисодий шарҳ» журнали таҳририяти 2022 йилнинг апрель ойида Ўзбекистонда аҳолига тақдим этилаётган энг даромадли истеъмол кредитлари ҳақида умумий маълумот тайёрлади.

Марказий банкнинг асосий ставкаси кўтарилганидан кейин банклар истеъмол кредитлари бўйича фоизларни оширди. Максимал миқдори — 540 млн сўм.

Ўтган йилнинг октябрь ойидаги шарҳ билан солиштирганда, ўртача йиллик ставка жорий йилнинг апрель ойида 25 фоиздан 29 фоизгача — 4 фоизга ошди. Мажбурий талаб — сотиб олинган товарлар Ўзбекистонда ишлаб чиқарилган бўлиши керак.

Истеъмол кредити — фақат Ўзбекистонда ишлаб чиқарилган товарлар ва хизматларни сотиб олишга бўлган эҳтиёжларни қондириш мақсадида тақдим этиладиган кредит.

Истеъмол кредитлари сотиб олинган товар ёки хизматлар суммасининг 100 фоизигача берилади. Истеъмол кредитининг объекти жисмоний шахснинг истеъмол эҳтиёжлари учун мўлжалланган Ўзбекистонда ишлаб чиқарилган товарлар (ишлар, хизматлар) бўлиши мумкин. 

Бугунги кунда Ўзбекистонда 32 та банк фаолият кўрсатмоқда.

Истеъмол кредитларини бериш ва уларни қайтариш миллий валюта — сўмда амалга оширилади. Тадқиқот шуни кўрсатдики, Ўзбекистондаги 32 та банкдан истеъмол кредитлари фақат 19 та банк томонидан берилмоқда.

Марказий банкнинг 2021 йил учун статистик маълумотларига кўра, банклар томонидан истеъмол кредитлари учун жами 9,6 трлн сўм ажратилган.

Қуйидаги банклар аҳолига истеъмол кредитлари бермайди: «Агробанк», «Асакабанк», «Ўзсаноатқурилишбанк», «Алоқабанк», «Тенге банк», «Давр банк», TBC банк, «Капиталбанк», «Ўзагроэкспортбанк», «Анорбанк», «Туркистон банк», «Мадад Инвест Банк», «КДБ Банк Ўзбекистон».

Ҳисоб-китобларга кўра, «Зираат банк» истеъмол кредитлари бўйича рейтингнинг етакчисига айланди. Бу ерда қуйидаги шартлар асосида кредит олиш учун ариза бериш мумкин бўлади: 36 ойгача йиллик фоиз ставкаси 25,5 фоиз ва максимал миқдори 81 млн сўм.

Истеъмол кредитлари рейтингига кўра, «Эрон Садерат банк» 2-ўринни эгаллади, бу ерда уч йил муддатга 26 фоиз йиллик ставкада ва энг катта миқдорда, яъни 540 млн сўмгача кредит расмийлаштириш мумкин бўлади.

«Қишлоқ қурилиш банк» рейтингда 3-ўринни эгаллади ва қуйидаги тартибда истеъмол кредитларини: йиллик фоиз ставкаси 27 фоиз, максимал миқдори 135 млн сўм ва 60 ойгача бўлган муддатга тақдим этмоқда.

Бундан ташқари, истеъмол кредитлари бўйича энг юқори фоиз ставкалари «Инвест Финанс банк» (37,99 фоиз) ва «Ҳамкорбанк» (38 фоиз) каби банклар томонидан ажратилмоқда.

Кредитлар бўйича маълумотлар шарҳ эълон қилинган вақт учун мавжуд. Кредит шартлари ўзгариши мумкин.

Аввалроқ Ўзбекистонда тижорат банкларига 300 млн долларлик кредит линияси ажратилгани ҳақида хабар берилган эди.