Самарқанд шаҳрида сохта ҳужжатлар орқали ўқишга киритиб қўйишни ваъда қилган шахс қўлга олинди, деб хабар беради Бош прокуратура ҳузуридаги департамент.
Маълум қилинишича, департаментнинг Самарқанд шаҳар бўлими томонидан тезкор тадбир ўтказилган. Тадбир давомида С.Х. исмли шахс фуқаро Ш.нинг ишончига кириб, унга танишлари ёрдамида Қозоғистондаги университетлардан бирида 3 йил ўқигани тўғрисида сохта ҳужжатлар тайёрлаб бериш орқали Самарқанд давлат университети Иқтисодиёт факультетининг 2-босқичига ўқишга киритиб қўйишни ваъда қилгани аниқланган. «Хизмати эвазига» 2 минг доллар олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Бухорода фуқаронинг Тожикистондаги ўқишини кўчириб бериш учун 2 минг доллар олган аёл қўлга тушгани, Сурхондарёда фуқаронинг Тожикистондаги ўқишини 1,5 минг доллар эвазига кўчириб беришни ваъда қилган шахс ушлангани тўғрисида хабар берилганди.
Мавзуга доир:
- ДХХ Самарқандда хориждан ўқишни кўчириш учун қалбаки ҳужжат тайёрловчи шахсларни қўлга олди
- Андижонда фуқароларнинг хориждаги ўқишини Ўзбекистонга кўчириб бериш учун жами 3,1 минг доллар олган шахслар ушланди
- Фарғонада 30 нафар талабанинг ўқишини Қирғизистондан Ўзбекистонга кўчириб бериш учун 67 минг доллар олган шахслар ушланди
Изоҳ (0)