Иқтисодий тадқиқотлар ва ислоҳотлар маркази март ойидаги ишбилармонлик фаолиятини таҳлил қилди. Бу ҳақда Марказ матбуот хизмати «Дарё»га маълум қилди.
Ҳудудлар кесимида Навоий вилоятида энг юқори ўсиш суръати қайд этилган, 5 та ҳудудида банк операциялари сони ошди, йирик корхоналар сони 268 тага кўпайди.
Ишбилармонлик фаоллиги индекси (ИФИ) 2022 йил март ойида 1026 бирликни ташкил этиб, февраль ойига нисбатан 2,6 фоизга ошди. Шунингдек, ИФИ ўтган йилнинг мос даврига нисбатан эса 16 фоизга ўсди.
2022 йилнинг март ойида ИФИ ўтган ойга нисбатан 2,6 фоизга ошиб, 1026 бирликни ташкил этиши қуйидаги компонентлар даражасидаги ўзгаришларга боғлиқ бўлган:- хўжалик юритувчи субъектларнинг банк ҳисоб варақаларидаги операциялар сони 0,9 фоизга ошган;
- фаолият кўрсатаётган хўжалик юритувчи субъектлар бўйича компонент 2,7 фоизга ошган;
- товар-хом ашё биржасида хом ашё сотиб олиш жадаллиги 3,7 фоизга ошган;
- товар белгилари бўйича компонент 5,8 фоизга ошган.
Ҳудудлар кесимида Навоий вилоятида энг юқори ўсиш суръати қайд этилган
2022 йил март ойида ишбилармонлик фаоллиги индекси 13 та ҳудудда ўтган ойга (2022 йил февраль) нисбатан ўсиш кузатилган. Навоий (45,8 фоиз), Жиззах (38,4 фоиз), Бухоро (36,8 фоиз) ва Сирдарё (29,4 фоиз) вилоятларида сезиларли даражада ўсиш кузатилган (2-расм).
Шу билан бирга, ушбу индекс Қашқадарё вилоятида ўтган ойга нисбатан 1,6 фоизга пасайиш кузатилган.
Банк ҳисоб варақалари бўйича операциялар сони
2022 йил март ойида банклараро тўлов операциялари сони 5 млн тани ташкил этди ва 2022 йилнинг февраль ойига нисбатан 45,2 минг транзакцияга (0,9 фоиз) ошган.
Банклараро тўлов операциялари сони 5 та ҳудудда ошган
2022 йил мартда республиканинг 5 та ҳудудида юридик шахслар ўртасидаги банк операциялари сони ўтган ойга нисбатан ошган. Хусусан, сезиларли даражадаги ўсиш Тошкент шаҳрида (4,1 фоиз) кузатилган. 9 та ҳудуддан Тошкент (-8,7 фоиз) ва Бухоро (-7,8 фоиз) вилоятларида сезиларли даражада пасайиш кузатилган.
Товар хом ашё биржасидаги фаоллик
2022 йилнинг март ойида ИФИнинг биржа компоненти 1,0369 бирликни ташкил этди. Бу эса ушбу компонентнинг ўтган ойга нисбатан 3,7 фоизга ўсганлигини англатиб, битимлар сонининг (13,2 фоиз) ошганлиги билан изоҳланади.
Республика товар-хом ашё биржасида товарлар савдоси умумий айланмаси ҳажми 2022 йил март ойида 6,8 трлн сўмни ташкил этиб, ушбу кўрсаткич ўтган ойга нисбатан 9,8 фоизга ошган.
Компанияларнинг фаоллиги
Фаолият юритаётган компаниялар бўйича компонент 2022 йил март ойида 1,0269 бирликни ташкил этиб, ўтган ойга нисбатан 2,7 фоизга ошганлигини кўрсатади. Ушбу кўрсаткич ўтган йилнинг мос даврига нисбатан 4,9 фоизга ошган.
Компаниялар сони 2022 йилнинг март ойига (581 775 бирлик) нисбатан 5 041 тага кўпайиб, 586 816 бирликни ташкил этган.
Йирик тадбиркорлик билан шуғулланувчи корхоналар сони 268 тага ошган
Ҳисобот даврида, кичик корхоналар сони 470 712 тадан 475 465 тагача ошган (ўсиш 4 753 та). Фермер хўжаликлари сони 107 710 тадан 107 730 тагача (ўсиш 20 та) ошган. Йирик тадбиркорлик билан шуғулланаётган субъектлар сони 3 621 тани ташкил этиб, 2022 йилнинг февраль ойига нисбатан 268 тага ошган.
Брендларни рўйхатга олиш
2022 йил март ойида савдо белгилари муҳофазаси бўйича бизнес фаоллиги индекси 1,0577 бирликни ташкил этиб, ушбу кўрсаткич 2022 йилнинг февраль ойига нисбатан 5,8 фоизга ошган. Жорий йилнинг март ойида юридик шахслар томонидан 330 та товар белгилари ва товар номлари рўйхатга олинган.
Изоҳ (0)