Буюк Британия бош вазири Борис Жонсон коронавирус чекловларини бузган ҳолда ўтказилган базмда иштирок этгани учун парламентдан кечирим сўради, деб хабар беради Deutsche Welle.
Нашр маълумотларига кўра, британиялик сиёсатчи локдаун вақтида ноқонуний уюштирилган базмдаги иштироки учун полиция томонидан жаримага тортилганидан бери биринчи марта Буюк Британия парламенти қонунчилари қаршисига чиққан.
«Вазиятдан фойдаланиб, йиғилишнинг биринчи куниданоқ Жамоатчилик палатаси қаршисида чин кўнгилдан сўраган узримни қайтармоқчиман. Хабарномани олишим билан айбимни тан олдим, одамлар ўзининг бош вазиридан муносиб ҳаракатларни кутишга ҳақли», — дейди Жонсон.
Жонсоннинг маълум қилишича, у қоидани атайлаб бузмаган ва парламентни чалғитиш ниятида бўлмаган, шу сабабли истеъфо бериш ниятида эмас.
«На ўшанда ва на ундан кейин Вазирлар Маҳкамаси залида жуда муҳим COVID стратегияси йиғилиши олдидан тўпланиш қоида бузилишига тенглаштирилиши мумкинлиги хаёлимга ҳам келмаган. Қайтараман, бу менинг хатойим эди ва мен бу учун чин дилдан узр сўрайман», — дейди бош вазир.
Таъкидлаш керакки, Британия сиёсий элитаси коронавирус пандемияси вақтида Partygate номини олган бир нечта базмларда иштирок этган. Полиция маълумотларига кўра, Жонсон бу каби тадбирларнинг камида олтитасида қатнашган.
Мавзуга доир: Британия соғлиқни сақлаш вазири маъшуқаси билан карантин қоидаларини бузгани учун истеъфога чиқди
Изоҳ (0)