АҚШ, Буюк Британия ва Канада Украинага артиллерия қуролларини юбориш ниятида. Мамлакат ҳарбийлари ушбу қуроллардан Россия томонидан Донбассга амалга ошириладиган ҳужумни қайтаришда фойдаланиши мумкин, деб хабар беради Reuters.
Учрашувдан сўнг Германия канцлери Олаф Шольц Украинага ҳарбий ва молиявий ёрдам кўрсатиш масаласи ҳақида гапирган. Унинг сўзларига кўра, НАТО олдингидек тўғридан-тўғри можарода иштирок этмоқчи эмас, бироқ Ғарб давлатлари Украина ҳукуматига зарур ёрдамни кўрсатишда давом этади. Шольцнинг ҳисоблашича, «Катта саккизлик» доирасида Киевга 50 миллиард евро миқдорида молиявий ёрдам кўрсатилиши мумкин.
Шу билан бирга, Германия канцлери Бундесвернинг қурол-яроғ етказиб бериш масаласидаги захираларнинг катта қисми сарфлаб бўлинганини таъкидлаган. Унинг қўшимча қилишича, Германия ҳукумати Украина учун қурол-яроғ етказишда мудофаа корхоналарига мурожаат қилган ва унинг харидини молиялаштиришга тайёр.
«ЕИ ва НАТОдаги шерикларимиз билан Россия ушбу урушни ютиши керак эмас деган якдил фикрдамиз», — дейди Шольц. У Россия президенти Владимир Путинни «даҳшатли урушни тўхтатишга» чақирган.
Апрель бошида АҚШ Сенати Украинага ленд-лиз дастури билан қурол етказиб бериш ҳақидаги қонун лойиҳасини маъқуллаганди. Қонун Жо Байденга Украинага қурол ва бошқа ёрдамлар етказиб беришни тезлаштириш имконини беради.
Изоҳ (0)