Тошкент шаҳрининг Яшнобод туманида тадбиркорга маълум бир маблағ эвазига имтиёзли кредит олиб беришни ваъда қилган шахслар қўлга олинди, деб хабар беради Бош прокуратура ҳузуридаги департамент.
Маълум қилинишича, департаментнинг Яшнобод туман бўлими томонидан ДХХ ходимлари билан ҳамкорликда тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган. Тадбир давомида М.М. ва С.Н. исмли шахслар «Д» МЧЖ раҳбари Х.нинг ишончига кириб, унга юқори лавозимда ишловчи танишлари орқали Тошкент шаҳрида фаолият юритувчи тижорат банкидан 2 миллион доллари миқдорида имтиёзли кредит олиб беришни ваъда қилгани аниқланган. Улар кредит суммасининг 5 фоизини ҳисоблаб, яъни 100 минг АҚШ доллари устама пули сўраган ва шундан 55 минг долларни олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Фарғона ва Наманганда ўзгалар номига кредит расмийлаштирган шахсларга жиноят иши очилгани, Наманганда қайнота ўғлининг қарзини тўлаш учун келини номига 2 млрд сўм кредит олгани, Тошкент вилоятида 2,6 млрд сўм кредит маблағларини талон-торож қилган банк ходими ушлангани тўғрисида хабар берилганди.
Изоҳ (0)