Наманган халқаро аэропортида зилзила ва ёнғин туфайли юзага келадиган фавқулодда вазиятлар оқибатларини бартараф этиш бўйича ўқув машғулоти бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Ўқув машқи режасига кўра, аэропорт ҳудудида ер силкиниши содир бўлди. Бу ердаги хизмат биносидан одамлар ташқарига қочиб чиқа бошлади. Устига устак, бинода зилзила натижасида талафот содир бўлди ва ёнғин келиб чиқди.
Юз берган ҳодиса ҳақида зудлик билан тегишли хизматлар ҳамда вилоят Фавқулодда вазиятлар ва Соғлиқни сақлаш бошқармаларига хабар берилди.
Аэропорт қутқарув хизмати ходимлари ёнғинни ўчириш ва бошқа ҳудудларга тарқалиб кетишининг олдини олиш мақсадида биринчи чораларни кўрди. Улар томонидан электр ва газ тармоқлари узилди.
Вилоят ФВБ ходимлари аэропортнинг фавқулодда вазият содир бўлган ҳудудига етиб келиб, ёнғинни бартараф етишда аэропорт қутқарув ходимларига ёрдам берди.
Биргаликдаги ҳаракатлар натижасида бино ичида қолиб кетган ходимлар қутқарилди ва тиббиёт ходимларига топширилди. Улар қутқарилган шахсларга биринчи ёрдам кўрсатди, оғир тан жароҳати олганлар эса шифохонага жўнатилди.
Ўқув машқи якунида турли тузилмаларнинг фавқулоддаги вазият чоғидаги ҳаракатлари батафсил таҳлил қилинди ва машғулотнинг кечиши қониқарли баҳоланди.
Изоҳ (0)