Тошкент вилояти Тошкент туманида 7 апрель куни хонадонлардан бирида ноқонуний боқилаётган шер 3 ёшли қизчага ҳамла қилгани ҳақида хабар берилганди. «Миллар» информацион дастурида ҳолат юзасидан қўшимча маълумот берилди.
Қайд этилишича, шернинг эгаси уни Instagram орқали қўшни давлатдан сотиб олган. Жониворнинг эгаси бўлган фуқаро Ш.А. (2004 йилда туғилган)дан ушбу шер боласини олиб келиш, сақлаш каби ҳолатлар бўйича керакли ҳужжатлар сўралганда ҳеч қандай ҳужжатлари йўқлигини айтиб, ўзининг қизиқиши туфайли ҳовлисида боқишини билдирган. Шер боласи суд қарори қабул қилингунига қадар вақтинча сақлаш учун питомникка топширилган.
«Дўконга қизимга сут олиш учун чиққан эдик. Шер орқадан бирданига ҳамла қилиб, боламни тортиб олиб кетиб қолди. Агар ўз вақтида ёрдам кўрсатилмаганда шер боламни еб қўйган бўларди. Худо қанақадир куч берди, устига ташланиб, пастки жағини очишга ҳаракат қилдим, тепа оғзини очишга кимдир ёрдам берди. Шернинг оғзи ичида эди болам, фақат оғрияпти деб йиғлаётганди», — дейди онаси
Бола ҳозирда Тошкент шаҳридаги 2-сон болалар жарроҳлик клиник шифохонасида даволанмоқда,
«Шер жабрланувчининг боши, ўнг елка ва даҳан соҳасидан тишлагани аниқланди. Қиз қутуришга қарши вакцинация қилинди. Боланинг бош мия, бош қутисида синиш, ўзгаришлар йўқ экан. Боланинг ҳаётига хавф соладиган аломатлар йўқ. Ветбўлимдан маълумот олиб келинди, шер қутурмаган», — дейди реабилитолог шифокор.
Ҳолат юзасидан ҳужжатлар жамланмаси судга тақдим этилади. Суднинг якуний қарори чиққач, шернинг эгаси, ҳайвонот боғи ёки питомникка берилиши бўйича қарор қабул қилинади.
Изоҳ (0)