Беларусликлар томонидан асос солинган EPAM Systems IТ компанияси минг нафарга яқин ходимларини Россия ва Беларусдан Ўзбекистонга кўчирди. Бу ҳақда «Forbes.ru» хабар бермоқда.
Маҳаллий тадбиркорлардан бири Forbes’га мамлакатдаги меҳмонхоналар тўла, Россия ва Беларусдан Ўзбекистонга кўчиб келганларнинг 80 фоизи «эпамовчилар» эканини айтади. Президент Шавкат Мирзиёевнинг 14 апрель куни бўлиб ўтган йиғилишида эълон қилинган маълумотларга кўра, жорий йил бошидан буён Ўзбекистонга 3 мингга яқин хорижлик IТ мутахассис келган.
EPAM компаниясининг Ўзбекистондаги филиали 2019 йилда очилган, 2021 йил ўрталарига келиб унда 150 га яқин мутахассис ишлаган. EPAM ҳам Ўзбекистон IТ паркининг резиденти ҳисобланади. Унинг аъзолари бир қатор солиқ имтиёзларига эга.
Ҳозир Ўзбекистонда бўлган EPAM ходимларидан бирининг айтишича, компания кўчиш жараёнида ходимларга барча тарафдан ёрдам бермоқда. Унга кўра, компания ходим ва унинг оиласи учун парвоз, турар жой ва кунлик харажатларни биринчи ойда тўлайди.
Ўзбекистондан ташқари, компания ходимларга яна 10 га яқин давлатга кўчишни таклиф қилмоқда. EPAM ходимларини кўчириш учун машҳур йўналишлар орасида Грузия ва Арманистон ҳам бор.
EPAM Россияни тарк этиш қарорини апрель ойининг бошида эълон қилди. Шу билан бирга, компания ўзининг россиялик ходимларини бошқа мамлакатларга кўчиришни аллақачон бошлаганини айтган.
EPAM Systemс 1993 йилда АҚШда беларуслик тадбиркорлар Аркадий Добкин ва Леонид Лознер томонидан ташкил этилган. Бош қароргоҳи Қўшма Штатларда жойлашган EPAM 40 дан ортиқ мамлакатда фаолият олиб боради.
Компаниянинг Россияда бир нечта ваколатхоналари бор эди. РБК маълумотларига кўра, 2021 йил охирида Россия EPAM’да 6190 киши ишлаган.
Аввалроқ россиялик IТ мутахассислар Ўзбекистонга интилаётгани ҳақида хабар берилган эди.
Изоҳ (0)