АҚШ президенти Жо Байден администрацияси сунъий йўлдошларга қарши қуролларни синовдан ўтказишга тақиқ жорий этмоқда. Бу ҳақда вице-президент Камал Харрис Ванденбергдаги (Калифорния) космик кучлари базасига ташрифи давомида маълум қилган.
Харрис бу «космик маконда масъулиятли хатти-ҳаракатларнинг халқаро стандарти»га айланиши учун бошқа давлатларни ҳам шу каби мажбуриятни зиммасига олишга чақирган.
«Сунъий йўлдошларга қарши синовлар ва чиқиндилар шаклланишининг сезиларли даражада камайиши АҚШ миллий хавфсизлик манфаатларига мос келади ҳамда мамлакатнинг космосдаги узоқ муддатли тадқиқотлари мақсадларини ҳимоя қилади», — дейилади Оқ уй хабарида.
АBC ва CNBC нашрларининг ёзишича, Қўшма Штатлар раҳбарияти бу каби ғояни Россиянинг 2021 йил 15 ноябрдаги синовларидан кейин кўриб чиқишни бошлаган. «Сунъий йўлдошга қарши ракеталарни синаш орқали космик объектларнинг йўқ қилиниши — бу бепарволик ва масъулиятсизликдир», — дейди Харрис. Вице-президентнинг сўзларига кўра, бундай тестлар натижасида пайдо бўладиган чиқиндилар сунъий йўлдошлар ва бошқа космик объектларга хавф туғдиради.
АҚШ Давлат департаменти раҳбари Энтони Блинкен 2021 йилнинг ноябрида Россия сунъий йўлдошга қарши ракетасини орбитада синаб кўрганини маълум қилганди. У манёврларни «ҳалокатли ва тентаклик» деб атаб, космик маконда 1,5 мингдан ортиқ бўлаклар пайдо бўлганини таъкидлаган. Давлат департаментининг ҳисоблашича, синовлар Халқаро космик станция астронавт ва космонавтлари учун хавфни оширган.
Россия Мудофаа вазирлиги синовлар вақтида 1982 йилдан буён орбитада бўлган ва фаолият кўрсатишдан тўхтаган «Selinaа-D» сунъий йўлдоши йўқ қилинганини маълум қилган. Идора маълумотларга кўра, тизим сунъий йўлдошни «заргарона» йўқ қилган, ҳосил бўлган бўлаклар эса орбитадаги ХКС ва бошқа аппаратларга зарар туғдирмайди.
Сунъий йўлдошларга қарши қуроллардан Россиядан ташқари яна учта давлат синаб кўрган: АҚШ, Хитой ва Ҳиндистон. Қўшма Штатлар бу каби манёврларни охирги марта 2008 йилда, SМ-3 ракетасини учириб, USА-193 носоз разведка сунъий йўлдошини йўқ қилганди.
Изоҳ (0)