Москвада «Газпромбанк» собиқ вице-президенти Владислав Аваев, унинг рафиқаси ва вояга етмаган қизи ўлик ҳолда топилди. Бу ҳақда Россия ҳуқуқ-тартибот органларига таяниб, «ТАСС» хабар берган.
Хабарда қайд этилишича учала жасад ҳам ўқотар қуролдан яраланиб, вафот этган.
«Тахминларга кўра, Аваев рафиқаси ва қизини отиб ташлаган, сўнгра ўз жонига қасд қилган бўлиши мумкин», — дея маълум қилган «ТАСС» манбаси.
Тергов қўмитасининг Москва шаҳар бошқармаси матбуот хизмати ҳалок бўлганларнинг исм-шарифларини ошкор этмаган ҳолда жиноятнинг шундай аломатларга эга эканини хабар қилган.
«ТАСС» манбасининг фикрича, ҳодисага маиший, ўзаро оилавий низо сабаб бўлган.
Владислав Аваев ОАВда «Карбоникс» компаниясининг таъсисчиларидан бири сифатида тез-тез қайд этиларди. Компания суяк ўрнини босадиган углерод имплантларини ишлаб чиқаради. Журналистлар «Карбоникс»нинг яна бир таъсисчиси Анастасия Карнеева «Ростех» раҳбари ўринбосари, истеъфодаги Федерал хавфсизлик хизмати генерали Николай Волобуевнинг қизи деб ҳисоблайди. «Карбоникс» ва «Ростех» Аваев бир вақтлар бошқарган «PT-Карбон»нинг таъсисчилари ҳисобланади.
«Московский комсомолец» нашри Владислав Аваевнинг бир вақтлар Россия президентининг ишлар бошқармаси ва Давлат думасида фаолият олиб боргани ҳақида ёзган. Кейинчалик Аваев давлат хизматидан бизнесга ўтган. «Газпромбанк»да ишлаган, Россия иқтисодий органларининг маслаҳатлашув кенгашига кирган. Тиббиёт соҳасига боғлиқ тижорат ишини юритган, «PT-Карбон»ни бошқарган, «Карбоникс»нинг назорат пакетига эгалик қилган. Аваевнинг рафиқаси Елена эса «Евроцемент» компаниясида ишлаган.
Изоҳ (0)