Украиналик сиёсатчи Виктор Медведчук Россия президенти Владимир Путин ва Украина етакчиси Владимир Зеленскийга уни Мариуполдаги аҳоли ва ҳарбий хизматчиларга алмаштириш илтимоси билан мурожаат қилди. Медведчукнинг видеомурожаати Украина Хавфсизлик хизмати (УXХ) томонидан эълон қилинган.
«Мен, Виктор Владимирович Медведчук, Россия президенти Владимир Путин ва Украина президенти Владимир Зеленскийга Украина томони мени Мариупол ҳимоячилари ҳамда бугун у ерда қолаётган ва гуманитар коридорлар орқали шаҳардан чиқиш имкониятига эга бўлмаган аҳолига алмаштиришни сўраб мурожаат қилмоқдаман», — дейилади УXХнинг Telegram каналида чоп этилган мурожаатда.
Идора матбуот хизматининг маълум қилишича, турли ҳисоб-китобларга кўра, Мариуполда «120 мингга яқин тинч аҳоли», шунингдек, «Азов» батальони жангчилари ва 36-денгиз пиёдалари бригадасининг ҳарбий хизматчилари қамалда қолмоқда.
12 апрель оқшомида Украина президенти Владимир Зеленский қўлига кишан солинган ва ҳарбий кийимидаги Медведчукнинг суратини эълон қилди. Шу билан бирга, у УXХга махсус операция ўтказгани учун миннатдорлик билдирди. Зеленский Россияга Медведчукни «асирликдаги украиналик йигит-қизлар»га алмаштиришни таклиф қилди. Кремль бунга жавобан Медведчук Россия фуқароси эмаслиги ва Россиянинг Украинадаги ҳарбий амалиётига унинг алоқаси йўқлигини таъкидлади.
Изоҳ (0)