«Барселона» ҳимоячиси Пике ва Испания футбол федерацияси президенти коррупцияда айбланмоқда

«Барселона» ҳимоячиси Херард Пике ва Испания футбол федерацияси (RFEF) президенти Луис Рубиалес коррупцион келишувда иштирок этган бўлиши мумкин. Бу ҳақида El Confidencial нашри хабар бермоқда.

Пике ва Рубиалес тил бириктириб, Испания Суперкубоги мезбонлигини тақдим этадиган шартнома учун Саудия Арабистони расмийларидан қўшимча 24 миллион евро ундирган. Бу Херардга тегишли Космос компанияси орқали амалга оширилган.

Қайд этилишича, RFEF Космос компанияси билан биргаликда Испания Суперкубогини Саудия Арабистони ўтказиш борасида келишувда эришган.

Космос RFEF ва Саудия Арабистони вакиллари ўртасида воситачилик қилган. Бу келишувга кўра, Пикенинг компанияси ҳар бир ўтказиладиган Суперкубок мусобақасидан 4 миллион евро даромад қилади (олтита мусобақа учун умумий 24 миллион евро). Саудияликлар бу пулни тўлаб бериш мажбуриятини ўз бўйнига олган, агар пуллар вақтида ўтказилмаса келишув бекор бўлади.

Испания Суперкубогини Саудияда ўтказиш бўйича битим 2019 йилда имзоланган. RFEF ўша вақтда Космос компаниясининг музокараларда иштирок этганини тасдиқлаганди. Бироқ Рубиалес Пикенинг компаниясига қандайдир тўлов амалга оширилганини инкор этган.

El Confidencial бу маълумотларнинг тасдиғи сифатида Пике ва Рубиалес ўртасидаги суҳбатнинг аудиоёзувини илова қилган:

«Руби, қара. Агар гап пулларда бўлса, ‘Реал’ 8 миллион еврога (Саудия Арабистонидаги Суперкубокда иштирок этиш учун) рози бўлади. ‘Реал’га 8 миллион, ‘Барселонаъга 8 миллион, қолганларга 2 ва 1 миллион берсанг бўлади. Федерация эса ўзига 6 миллион олиб қолади. Биз эса яна 1-2 миллион евро учун Саудия Арабистонига босим ўтказишимиз мумкин», — деган каталонияликлар ҳимоячиси.

Бошқа бир аудиоёзувда эса Рубиалес Пикени шартнома имзолангани билан табриклагани қайд этилган.

Саудия Арабистони билан келишувга кўра, Испания футбол федерацияси ҳар йили 40 миллион евро миқдорида кафолатланган тўловларни олади. Ундан ташқари Рубиалеснинг маоши ҳам бир неча баробар ошган.