Ижтимоий тармоқларда Тошкент шаҳри Чилонзор туманида номаълум шахс Cobalt автомашинасида болалар билан ўйнаётган кучук боласини уриб кетгани ҳақида хабарлар тарқалди. Шаҳар Ички ишлар бош бошқармаси ҳолат бўйича маълумот берди.
Қайд этилишича, Чилонзор тумани ИИБга аёл (43 ёшли) ариза билан мурожаат қилиб, 12 апрель куни соат тахминан 18:00 да номаълум эркак ўз автомобилида жониворни босиб кетганини маълум қилган. Сўнг ушбу шахс вояга етмаган болаларнинг кўз олдида ўз ҳаракатларини давом эттириб, Cobalt автоуловида номаълум томонга ҳаракатланиб кетган. Ҳолат гувоҳи бўлганлар машина рақамини тасвирга олишга улгурмаган.
Айни вақтда жониворга озор етказган шахсга нисбатан қонуний чора кўриш учун терговга қадар текширув ишлари олиб борилмоқда.
Аввалроқ Тошкент вилоятида итини «Жигули» томидаги юкхонага боғлаб ҳаракатланган ҳайдовчи судга берилганди. Шунингдек, Тошкентда итни ўлдириб, ваннага осиб қўйган эркак 2,5 млн сўм жаримага тортилгани ва Қашқадарёда ёш бола кўз ўнгида эшакларни калтаклаган ота 12 суткага қамалгани хабар қилинган.
Изоҳ (0)