Наманганда тиббиёт ходимлари учун спектаклларни бепул намойиш этиш тажрибаси йўлга қўйилди. Бу ҳақда «Дарё» мухбири Азизбек Абдувалиев хабар бермоқда.
Жорий йил 18 март куни президентнинг тиббиёт ходимлари билан очиқ мулоқоти давомида тиббиёт ходимлари учун маданий тадбирлар, жумладан, концерт ва спектаклларни бепул намойиш этиш зарурлиги тўғрисида фикр билдирилган эди.
Ушбу ташаббус биринчилардан бўлиб Наманганда амалга оширилди. Вилоят мусиқали драма театрида драматург Нурилло Аббосхон қаламига мансуб, режиссёр Шуҳрат Абдуллаев томонидан саҳналаштирилган «Азиз» спектакли тиббиёт ходимлари учун бепул намойиш этилди. Оила ва қадриятлар мавзусидаги спектакль томошабинларга манзур бўлди.
Вилоят соғлиқни сақлаш бошқармаси мутасаддиларининг маълум қилишича, Намангандаги барча шаҳар-туманларда вилоят мусиқали драма театри рэпертуаридаги спектаклларнинг тиббиёт ходимлари учун бепул намойиши давом этади.