Megan Markl Britaniya qirollik oilasidagi irqchilik haqida gapirib, shov-shuvga sabab bo‘lgan intervyusidan keyin ilk bor qirolicha Yelizaveta II bilan uchrashdi

Shahzoda Garri va rafiqasi Megan Markl Buyuk Britaniyaga uchib keldi hamda qirolicha Yelizaveta II va shahzoda Charlz bilan uchrashdi, deb xabar bermoqda ITV.

14-aprel kuni Garri va Meganni Vindzor qasridagi Avliyo Georgiya ibodatxonasiga ketayotganida ko‘rishgan, deyiladi xabarda. Sasseks gersogi va gersoginyasining matbuot kotibi BBC News'ga ular qirolicha bilan uchrashganini tasdiqlagan. Juftlik Niderlandiyada o‘tkaziladigan Invictus Games (Imkoniyati cheklangan harbiylar o‘rtasida xalqaro ko‘p tarmoqli musobaqalar. Ular 2014-yildan beri shahzoda Garri tashabbusi bilan o‘tkaziladi) musobaqalariga ketayotgan paytda Buyuk Britaniyada to‘xtab o‘tgan.

Shu tariqa Shahzoda Garri va Megan Markl 2020-yil mart oyida qirollik a’zoligidan voz kechib, Kanadaga, keyin esa AQShga ko‘chib o‘tgandan keyin Buyuk Britaniyaga birinchi marta birgalikda tashrif buyurdi. Shahzoda Garri Buyuk Britaniyaga 2021-yilning iyul oyida kelgan, uning rafiqasi esa kelmagan.

ITV ta’kidlashicha, bu Meganning 2021-yil mart oyida amerikalik teleboshlovchi Opra Uinfriga qirollik oilasidagi irqchilik haqida gapirgan intervyusidan keyin birinchi marta qirolicha Yelizaveta II bilan uchrashishi. Intervyuda Megan Marklning qirollik oilasi a’zolaridan biri ularning o‘g‘li Archining tanasi qanchalik qora bo‘lishidan xavotir bildirganini aytgandi (aniq kimligi aytilmagan, ammo bu Yelizaveta II emasligi ta’kidlangan).

Irqchilik suhbatda ko‘tarilgan eng jiddiy masalalardan biri bo‘lgandi. Shahzoda Garrining ukasi shahzoda Uilyam Britaniya qirollik oilasi “irqchi emas” deb ishontirdi. Suhbatdan so‘ng Bukingem saroyi qirollik oilasining barcha qarorgohlarida xilma-xillik siyosatini qayta ko‘rib chiqishga qaror qildi.