Тошкент шаҳар ҳокими собиқ ўринбосари Сардор Абдуллаев Uzbekistan Airports бошқарув раисига ўринбосар бўлди

Uzbekistan Airports АЖда персонал ва ахборот технологиялари бўйича раис ўринбосарлари тайинланди. Бу ҳақда акциядорлик жамияти матбуот хизмати хабар берди.

Хусусан, Сардор Абдуллаев Uzbekistan Airports АЖ бошқаруви раисининг ахборот технологиялари бўйича ўринбосари лавозимига тайинланган.

Маълумот учун, Сардор Абдуллаев 1983 йил 27 декабрда Тошкент вилоятида туғилган. 2001—2007 йилларда Тошкент давлат иқтисодиёт университетининг бакалавриат ва магистратура босқичларини тамомлаган. У бир неча йил давомида Вазирлар Маҳкамасининг ахборот технологиялари, телекоммуникациялар ва ахборот хавфсизлиги департаментида ишлаган. 2020 йилдан 2022 йилгача Тошкент шаҳар ҳокимининг ахборот технологияларини жорий этиш бўйича ўринбосари бўлган.

Аввалроқ Алексей Хен Сардор Абдуллаев ўрнига Тошкент шаҳар ҳокимининг ахборот технологияларини жорий этиш бўйича ўринбосари — Рақамли ривожланиш департаменти раҳбари лавозимига тайинлангани тўғрисида хабар берилганди.

Шунингдек, Баҳодир Мирусманов Uzbekistan Airports АЖ бошқаруви раисининг персонал бўйича ўринбосари лавозимига тайинланган. У Ўзбекистон президенти ҳузуридаги Давлат хизматини ривожлантириш агентлигининг Давлат хизматчилари фаолиятини мониторинг қилиш ва баҳолаш департаменти мудири лавозимида ишлаган.

Баҳодир Мирусманов Тошкент тўқимачилик ва енгил саноати институтини тамомлаган, Давлат статистика қўмитаси ҳамда Ўзбекистон президенти администрациясида фаолият юритган.

Эслатиб ўтамиз, Раъно Жўраева 2021 йилнинг февралида Uzbekistan Airports компаниясига директор этиб тайинланганди. Бунга қадар у Россиянинг энг йирик авиацион ва космик холдинги раҳбари лавозимида ишлаб келаётган эди.