Эронда Мирзо Улуғбек ва Алишер Навоий битиклари аниқланди, деб хабар беради Туризм ва маданий мерос вазирлиги матбуот хизмати.
Маълум қилинишича, битиклар Маданий мерос агентлиги директори биринчи ўринбосари Турсунали Қўзиев ва Тошкент вилояти маданий мерос бошқармаси бошлиғи Мансур Исроиловнинг Эронга амалга оширган хизмат сафари давомида аниқланган.
«Эроннинг шимоли-ғарбида Темурийлар даврининг кўплаб маданий мерос обидалари мавжуд. Амир Темур Эронга ташрифи давомида Машҳад вилоятидаги Тойинобод шаҳрида шайх Абу Бакр Зайн-ул Обиддин Тоййибиний билан учрашган ва у билан дўстлашиб қолган. Узоқ йиллар давомида у билан ёзишиб турган. Ушбу дўстлик ҳурмати Амир Темурнинг ўғли Шоҳрух Мирзо Тойинобод шаҳрида ажойиб масжид қурдиради. Масжид бугунги кунга қадар сақланиб қолган ва кўплаб алломаларимизнинг дўстона муносабатларини ўзида муҳрлаган. Шуниси диққатга сазоворки, кўп ҳукмдорлар ва таниқли арбоблар бу масжидга келиб, намоз ўқишни ўзлари учун шараф деб билишган. Масжиднинг деворида юқори мартабали меҳмонлар учун ҳурмат девори бўлиб, уларда меҳмонлар ўз тилаклари ёки битикларини ёзиб қолдиришган. Уларни кўздан кечираётиб, ажойиб янгилик – Мирзо Улуғбек ва Алишер Навоий битикларини кашф этдик», — дейди Турсунали Қўзиев.
Таъкидланишича, президентнинг 2021 йил 19 июндаги «Ўзбекистон Республикаси Туризм ва спорт вазирлиги ҳузуридаги Маданий мерос агентлиги фаолиятини ташкил этиш ҳамда соҳани инновацион ривожлантириш чора-тадбирлари тўғрисида»ги қарорида маданий мерос объектларини реставрация қилишда Эрон ва Туркия давлатларидан малакали мутахассисларни Ўзбекистонга таклиф қилиш ҳамда улар иштирокида асрашга доир ишларни ташкил этиш белгиланган. Мазкур топшириқ ижросини таъминлаш мақсадида 2022 йилнинг март ойида Эронга хизмат сафари ташкил этилган. Маълум қилинишича, айни дамда улуғ алломалар битикларини илмий жиҳатдан ўрганишга доир ишлар олиб борилмоқда.
Аввалроқ Самарқандда харобага айланган «Баҳодир Ялангтўшбий» масжиди янгитдан қурилиши, Бухорода археологик ёдгорлик ҳудуди яйлов учун бериб юборилгани, Ичан қалъада ўрта асрлар ижтимоий ҳаётини акс эттирувчи ҳайкаллар ўрнатилгани тўғрисида хабар берилганди.
Изоҳ (0)