Мудофаа вазирлиги ҳузуридаги «Ҳарбий Савдо-Чирчиқ» ДУКда 15,3 миллиард сўмлик молиявий хато ва камчиликларга йўл қўйилгани аниқланди. Бу ҳақда Коррупцияга қарши курашиш агентлиги матбуот хизмати маълум қилди.
Маълум қилинишича, Коррупцияга қарши курашиш агентлигига «Ҳарбий Савдо-Чирчиқ» ДУК мансабдорларининг ноқонуний хатти-ҳаракатлари, жумладан, жуда кўп миқдордаги мулкларни талон-торож қилиш, ўз мансаб ва хизмат мавқейидан қонунга хилоф равишда фойдаланиб, пул маблағларини ўзлаштириш, «Давлат харидлари тўғрисида»ги қонун ҳужжатларини бузиш ва бошқа турдаги иқтисодий жиноятлар содир этиб келинаётгани бўйича фуқаролардан келиб тушган мурожаат асосида мазкур корхонада ўрганиш ўтказилган.
Ўрганиш давомида корхона моддий жавобгар шахслари томонидан меҳнат муносабатлари, давлат харидлари тартибини белгиловчи ҳамда бошқа қонун ҳужжатларининг бузилиши натижасида корхона фаолиятида жами 15,3 миллиард сўмлик молиявий хато ва камчиликларга йўл қўйилгани аниқланган.
Ўрганиш якунлари бўйича тўпланган ҳужжатлар Жиноят-процессуал кодексининг 329-330-моддаларига асосан қонуний қарор қабул қилиш учун 2022 йил 24 февраль куни Бош прокуратурага юборилган.
Ҳолат юзасидан Ўзбекистон Ҳарбий прокуратураси томонидан терговга қадар текширув ҳаракатлари ўтказилиб, 2022 йил 12 март куни «Ҳарбий Савдо-Чирчиқ» ДУК моддий жавобгар шахсларига нисбатан Жиноят кодексининг 167-моддаси (ўзлаштириш ёки растрата йўли билан талон-торож қилиш) 2-қисми «г» банди билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
Бундан олдин Бандлик вазирлиги жамғармасига нотўғри ва ортиқча сарфланган салкам 407 млн сўм маблағ қайтарилгани, Халқ таълими тизимида 27,5 млрд сўмлик ўғирлик ва камомад аниқлангани тўғрисида хабар берилганди.
Изоҳ (0)