Хитойлик YouTube блогер Син Чжилей ўзининг мушуклари учун кичик ҳажмда, аммо тўлиқ функсионал бўлган метро тизимини ишлаб чиқди, деб ёзади РБК. Метро тунеллар, бекатлар ва ҳаракатланадиган поездлардан иборат.
Блогер муҳандислик бўйича таълим олган бўлиб, унинг техник билимлари бу ғаройиб лойиҳани амалга ошишида асосий рол ўйнаган.
Метро ғояси икки йил аввал яратилган мушуклар учун махсус уй лойиҳасидан кейин пайдо бўлган. Ўша пайтда блогер ўз қўли билан мушуклар учун бутун бошли “мини шаҳар” барпо этган. Унда кибертрак, спа салон, квадротцикл, супермаркет, гараж ва ҳатто театр ҳам мавжуд бўлиб, томошабинлар бу ишни кўриб, ундан янада каттароқ ва мураккаброқ лойиҳа яратишини сўрашган. Натижада “мушуклар дунёси” лойиҳасининг давоми сифатида мини метро қурилган. Лойиҳани тўлиқ якунига етказиш учун тўрт ой вақт кетган.
Метро қурилиши жараёнида Син Чжилей икки асосий қийинчилик билан юзлашди. Биринчиси — поезд эшиклари билан платформа эшикларини бир вақтда очилиб-ёпиладиган тарзда созлаш эди. Бу метро ишини реал кўринишда намойиш этишда жуда муҳим ҳисобланган. Иккинчи қийинчилик эса тўлиқ ишлайдиган эскалатор ясаш бўлиб, бунда механика бўйича чуқур билим билан бирга ижодий ёндашув ҳам талаб қилинган.
Натижада метро батафсил ва мукаммал кўринишга эга бўлди: поезд тунеллардан ўтиб, мушук йўловчиларга мўлжалланган станцияга келади. Платформа эшиклари поезд эшиклари билан бир вақтда очилиб-ёпилади, бу эса мушукларга бемалол кириб-чиқиш имконини беради. Мини эскалатор эса лойиҳага янада кўпроқ реаллик муҳитини беради.
Син Чжилей бундан аввал бошпанасиз мушуклар учун 100 та иситиш тизимига эга уйчалар қуриб, уларни қишнинг совуғидан ҳимоя қилган эди.
Изоҳ (0)