Хитойнинг Тянсзин университети олимлари янги авлод литий-метал батареясини ишлаб чиқди. Унинг кучи Tesla ишлаб чиқарадиган батареялардан икки баробар ортиқлиги айтилмоқда. Бу ҳақда The Independent хабар берди.
Маълум қилинишича, қурилманинг энергия зичлиги бир килограм учун 600 ватт-соатдан ортиқ бўлиб, у Tesla электромобилларида қўлланилаётган энг илғор батареялардан икки баравар самаралироқ. Оддий литий-ион батареяларига қараганда литий-метал батареялар назарий жиҳатдан анча кучли ҳисобланади. Tesla ишлаб чиқараётган батареялар 300 ватт-соат/кг қувватга эга бўлса, BYD’нинг “Blade” батареялари атиги 150 ватт-соат/кг имкониятга эга.
Тянсзин олимлари эса “делокализацияланган электролит” технологияси ёрдамида 604,2 ватт-соат/кг натижага эришди. Бу эса Хитойнинг “Маde in China 2025” дастурида белгиланган 400 ватт-соат/кг мезондан анча юқори. Тадқиқотчиларнинг изоҳ беришича, янги турдаги электролит ионларнинг тезроқ ва барқарор ҳаракатланишига имкон беради, бу эса батарея ишлаш муддатини узайтиради ва хавфсизликни оширади. Синов натижаларига кўра, янги батарея 100 марталик циклда ҳам барқарор ишлашни давом эттирган.
Олимлар технологияни аллақачон дронлар учун юқори қувватли батареялар ишлаб чиқаришда синаб кўрган. Мутахассислар бу ечим келажакда электромобиллар, смартфонлар ва бошқа кўплаб қурилмаларда инқилобий ўзгаришларга сабаб бўлиши мумкинлигини айтмоқда.
Изоҳ (0)