Хорижий давлатларда мураккаб молиявий вазиятда қолган 621 нафар фуқаро Ўзбекистонга қайтарилди. Бу ҳақда Миграция агентлиги матбуот хизмати хабар берди.
Мамлакатда 30 июлдан 30 августгача “Ватанга қайтариш” лойиҳаси эълон қилинганди. Юқоридаги шахслар лойиҳага эълон қилинган кундан бошлаб 18 августгача Миграция жамғармаси маблағлари ҳисобидан олиб келинган фуқаролардир.
Улар қуйидаги давлатлардан ватанга қайтарилди:
- Россия — 460 нафар;
- Туркия — 71 нафар;
- АҚШ — 56 нафар;
- Қозоғистон — 17 нафар;
- Жанубий Корея — 4 нафар;
- Ҳиндистон — 3 нафар;
- Япония — 3 нафар;
- Польша — 3 нафар;
- Миср — 2 нафар;
- Қирғизистон — 1 нафар;
- Саудия Арабистони — 1 нафар.
Маълум қилинишича, уларнинг 326 нафари аёллар, 295 нафари эркаклар. Шундан 189 нафари вояга етмаган болалар бўлган.
Бугунги кунгача Миграция агентлигига жами 2 045 та мурожаат келиб тушган. Шундан 1406 нафақар фуқарога тушунтириш ва ҳуқуқий маслаҳатлар берилган. 639 нафар фуқародан ватанга қайтариш юзасидан мурожаатлар қабул қилинган.
“Ватанга қайтариш” хайрия гуманитар акцияси режасига асосан, аввало Туркия, Россия, Қозоғистон, БАА, Саудия Арабистони, Ҳиндистон, АҚШ ва Кореядаги депортация марказларида бўлиб турган аёллар ва болалар ватанга қайтарилади. Хорижда оғир молиявий аҳволда қолган фуқаролар Консуллик муассасалари ёки Миграция агентлиги ваколатхоналари хулосаси асосида Ўзбекистонга олиб келинади.
Ватанга қайтарилган фуқароларни самарали реинтеграция қилиш бўйича амалий чоралар кўрилади. Улар давлат томонидан тақдим этилаётган мақсадли субсидиялар, имтиёзли кредитлар, тадбиркорлик ва ўзини ўзи банд қилиш дастурлари орқали қўллаб-қувватланади. Маҳаллий ҳокимликлар, Бандлик вазирлиги, Оила ва хотин-қизлар қўмиталари, ватанга қайтарилган фуқароларни руҳий, ижтимоий ва иқтисодий мослаштириш ишларини амалга оширади.
Изоҳ (0)