Самарқанд вилоятининг Булунғур туманидаги хонадонда хонадон вакиллари фойдаланиб келаётган газ баллонида чақнаш содир бўлди. Натижада хонадон эгаси, унинг турмуш ўртоғи ва 10 ёшли қизи куйиш тан жароҳатини олди. Бу ҳақда «Дарё»га мурожаат қилинганидан сўнг мухбир Фарҳод Норбўтаев воқеа жойида бўлди.
Маълум бўлишича, воқеа 2022 йилнинг 11 апрель куни эрталаб соат 07:00 атрофида содир бўлган.
Булунғур тумани «Авлиё Парпи» маҳалласидаги Нарзуллаевлар хонадонида бўлган кўнгилсизлик оқибатида жабрланган 55 ёшли хонадон эгаси, унинг 42 ёшли хотини ва 10 ёшли қизи жароҳат олиб, Булунғур туман тиббиёт бирлашмасига ётқизилган.
Жабрланувчининг укаси Жамол Нарзуллаевнинг айтишича, у воқеа содир бўлишидан бир кун аввал акасининг уйида бўлган. Ўзаро суҳбатлашиб, кечаси соат 01:00 атрофида уйига қайтган.
«Эрталаб соат 07:10 да менга хабар борди. Етиб келиб, тез ёрдам машинаси келгунича учаласини ҳам ташқарига олиб чиқдим. Тез ёрдам машинаси келганидан сўнг ҳаммасини шифохонага олиб бордим. Қўни-қўшнилар ҳам ёрдам бериб, уйдаги нарсаларни чиқариб, ёнғинни ўчиришган», — дейди Жамол Нарзуллаев.
Жамол Нарзуллаевнинг айтишича, хонадондаги газ баллони портламаган.
«Газ баллоннинг жўмраги бўлмаган. Мен уйга келганимда уйдаги ҳамма нарсани ташқарига чиқариб, баллонга қараганимда ҳали ҳам ундан газ чиқиб ётган экан. Қўлбола қилиб беркитилган. Аммо эплай олишмаган. Мен ҳали уларнинг ўзлари билан умуман гаплашганим йўқ. Тахминимча, деразаларнинг биттасида ойна бўлмаган. Шамол кириши натижасида иккинчи хона газ билан тўлган. Газ баллони чақнашидан сўнг қўни-қўшнилар хабар топган», — дейди Жамол Нарзуллаев.
Булунғур туман тиббиёт бирлашмасига келтирилган беморларга кўрсатилаётган тиббий ёрдамга қарамасдан уларнинг аҳволи оғирлигича қолмоқда.
«11 апрель куни соат 9:00 да туман шифохонасига тез ёрдам машинасида уч нафар бемор олиб келинди. Бир оиланинг уч нафар аъзоси газ баллонидан нотўғри фойдаланганлиги оқибатида куйиш тан жароҳатини олган экан. Беморларнинг икки нафарида 80 фоиз, бир нафарида 90 фоиз куйиш бор. Кўрсатилаётган тиббий ёрдамга қарамасдан беморларнинг аҳволи оғирлигича қолмоқда», — дейди Булунғур туман тиббиёт бирлашмаси реанимация бўлими шифокори Искандар Сувонов.
Жабрланувчининг укаси Жамол Нарзуллаевнинг айтишича, воқеадан хабар топган туман газ таъминоти бўлими мутасаддилари ҳолат содир бўлган жойга келиб, газ баллони уларга тегишли эмаслигини билдирган.
«‘Тумангаз’дан одам келиб бу газ баллон бизники эмас деб, тан олмай кетган. Шунга жаҳлим чиқяпти. Бозордан сотиб олганимиз йўқ. Биз иккита газ баллон олганмиз. Уларнинг ҳужжатлари ҳам бўлиши керак. Газ баллон чиқарадиган заводимиз бўлмаса, уни ясаб бўлмаса, қандай уни тан олмаслиги мумкин? Ҳар икки ойда уни кўрикдан ўтказиш муддати бўлади. Буни текшириб кўрганда рақамлари бор экан ва унинг яроқлилик муддати ўтиб кетган экан», — дейди Жамол Нарзуллаев.
«Булунғуртумангаз»нинг суюлтирилган газ таъминоти бўлими бошлиғи Мирзоҳид Ҳакимовнинг таъкидлашича, 2022 йилнинг 18 февраль куни «Авлиё Парпи» маҳалласига газ баллонлари тарқатилган. Мирзоҳид Ҳакимов чақнаган газ баллони уларга тегишли эмаслигини маълум қилиб, баллондан фойдаланишда техника хавфсизлиги қоидаларига риоя қилинмаганлигини билдирди.
«Ўша куни ҳолатни ўргандик. 2022 йилнинг 18 февраль куни ‘Авлиё Парпи’ маҳалласига газ баллонлари тарқатилган экан. Ўрганганимизда техника хавфсизлик қоидалари қўпол равишда бузилганлиги, газ баллон бизга тегишли эмаслиги, унинг жўмрагига симдан ясама очиш ускуналари ясаб қўйилгани маълум бўлди», — дейди Мирзоҳид Ҳакимов.
Мурожаатчи туманда яроқсиз газ баллонлари тарқатилгани ортидан ‘тумангаз’нинг олти нафар ходими ишдан олинганини баён қилди. Мирзоҳид Ҳакимов эса улар бошқа сабаб билан ишдан кетганини таъкидлади.
«Мен ундай ҳолат бўлганини билмайман. Ходимлар бошқа хатоликлар билан, аниқроғи, камомад учун ишдан олинган», — дейди Мирзоҳид Ҳакимов.
Жамол Нарзуллаевнинг қўшимча қилишича, газ баллон тарқатувчи ходим унинг носозлигини айтган. Аммо акаси носоз бўлса-да уни олиб ишлатган. Акасининг энг катта хатоси шу бўлган.
«Портлаган газ баллонини акамнинг яқинда хизматга кетган ўғли олиб келган. Одатда газ баллонлари битта уйга келиб тушади. Ёки машинада олиб келинган пайтда одамларни бир жойга тўплашади. Газ баллонини тарқатган одам ҳам акамга баллон яроқсиз эканини айтган экан. Аммо акам шундай бўлса-да, олиб ишлатган. Бир кун ёққанми, уч кун ёққанми буниси менга қоронғи. Газ баллон тарқатган одамга ҳам гапирдим. Жойи келганда айтаман, тахминан, бир машинада 100-150 та газ баллон келса, шунинг 10-15 таси яроқсиз бўлиб чиқади. У эса кимнингдир бошини ейди», — дейди Жамол Нарзуллаев.
«Чақнаш бўлганидан кейин ҳамма нарса бир ёниб, сочилиб кетган. Ёнғин бўлмаса, уйнинг шифти қандай ёнади? Ахир бу ерга бўз тортилган бўлган. Тўғри, аланга бўлиб ёнмаган. Қисқа вақтга ёниб ўчган. Аммо Фавқулодда вазиятлар бўлимига қўнғироқ қилиш хаёлимга ҳам келмаган», — дейди суҳбатдош.
26 йилдан буён фарзандларини ёлғиз катта қилиб келган жабрланувчининг онаси Турдихол Нарзуллаеванинг айтишича, воқеа содир бўлган жойга Булунғур туман ҳокими келиб, хонадон эгаларига ёрдам беришини маълум қилган.
«Неварамнинг айтишича, туман ҳокими келиб ўзимиз қўлдан келганча ёрдам қиламиз деб айтибди. Ёрдам берса, Худо ёрлақасин. Акалари бари югуриб юрибди. Туришимиз шу. Энамнинг қон босими бор, деб менга айтишмаган. Кейин билдим. Обеддан сўнг мана шу вайрона уйга келдим. 26 йилдан буён отасиз олти фарзандимни катта қилгандим. Одамлар ёрдам берган. Элга, халққа раҳмат. Қўни-қўшнилари ёрдам берган. Уларга раҳмат», — дейди Турдихол Нарзуллаева.
«Дарё» мухбирининг аниқлашича, 2021 йилнинг декабрь ойида «Булунғуртумангаз» вакиллари томонидан тумандаги 2200 нафардан ортиқ истеъмолчидаги маиший газ баллонлар газ тўлдириш важи билан олиниб, қайтариб берилмаган. Мазкур ҳолат кейинчалик «Ҳудудгазтаъминот» акциядорлик жамияти томонидан тасдиқланган. Булунғур тумани ҳокимлиги ахборот хизматининг маълум қилишича, ҳолат юзасидан жиноят иши қўзғатилган.
Изоҳ (0)