Тошкент ва Бишкек ўртасидаги автобус қатновлари қайта тикланди

2022 йил 15 апрелдан бошлаб Тошкентдан Бишкекка халқаро автобус қатнови йўлга қўйилди, деб хабар беради «Tashtrans.uz».

«Тошкент» автовокзалининг сайтида ҳаракатланиш жадвали келтирилган бўлиб, унга кўра рейслар ҳар куни икки марта амалга оширилади — соат 18:00 ва 19:00 да.

Тошкент—Бишкек йўналишининг узунлиги 601 километр, ҳаракатланиш давомийлиги — 12 соат 40 дақиқа.

Автобуслар «Тошкент» автовокзалидан йўлга чиқади. Чипталар нархи 250 минг сўмни ташкил этади, уларни автовокзал кассаларидан харид қилиш мумкин.

Эслатиб ўтамиз, Тошкент—Бишкек халқаро автобус рейси 2020 йилда коронавирус пандемияси сабаб тўхтатилган эди.

Аввалроқ Тошкент шаҳридан қўшни давлатлардаги бир қанча вилоятларга халқаро рейс 11 апрелдан тажриба сифатида йўлга қўйилганди. Хусусан, «Тошкент» автовокзалидан Тошкент—Қизил Ўрда йўналишига соат 17:00 дан, Тошкент—Олмаота йўналишига соат 18:00 дан тажриба сифатида рейслар очилган.