Шавкат Мирзиёев 15 апрель куни озиқ-овқат маҳсулотлари ишлаб чиқаришни кўпайтириш орқали бозорларда нарх-наво барқарорлигини таъминлаш ҳамда бизнесни қўллаб-қувватлаш бўйича қўшимча шароитлар яратиш бўйича ўтказилган йиғилишда деҳқон ва фермерларини энг кўп қийнайдиган масалаларни санаб ўтди.
Давлат раҳбарининг сўзларига кўра, бу ҳосилдор ва ишончли уруғ ва кўчат навларининг камлиги ва пешона тери эвазига етиштирилган маҳсулот кафолатли харид қилинмаслигидир.
Шу сабабли, ҳосилдор уруғ ва кўчат навларини жойларга етказиш ва маҳсулотни сотиб олишга Қишлоқ хўжалиги жамғармасидан Боғдорчилик агентлигига қўшимча 300 миллиард сўм ажратилади. Шунингдек, янги сув омборлари атрофидаги 100 минг гектардан ортиқ ерларга тадбиркорларни жалб этиб, инфратузилма яратишга ёрдам бериб, мос келадиган экинлар экишни ташкил қилиш кераклиги кўрсатиб ўтилди.
Вилоят ҳокимларига бир ой муддатда:
- ўз ҳудудидаги сув омборлари атрофидаги янги ерларнинг харитасини тузиш;
- ерларни контурларга ажратиб, уларга ирригация тармоғини лойиҳалаш;
- ушбу майдонларда озиқ-овқат ва озуқа экинларини экишга тайёр инвесторларни жалб қилиш бўйича лойиҳа тўпламларини тайёрлаш топширилди.
Президент, шунингдек, жаҳон бозорида минерал ўғитлар ва ёқилғи нархлари 2 бараварга ошгани албатта кластер, фермер ва деҳқонларнинг етиштираётган маҳсулотларининг таннархига ҳамда молиявий аҳволига таъсир қилишини қайд этиб ўтган.
Изоҳ (0)