Россиянинг «Татнефть» компанияси Ўзбекистондаги лойиҳаларини давом эттирмоқчи. Бу ҳақда корхона бош директори Наил Маганов меҳнат жамоаси анжуманида айтиб ўтди.
Бизнинг муҳандислик малакамиз, геология-қидирув ва нефть қазиб олиш бўйича тажрибамиз катта талабга эга ва биз Туркманистон, Ўзбекистон, Қозоғистон ва Шимолий Африкадаги лойиҳаларни давом эттирамиз, — деди Маганов.
«Татнефть» Ўзбекистонда нима билан шуғулланади?
Компаниянинг Ўзбекистонда бир қанча лойиҳалари бор.
Биринчидан, геология-қидирув. 2019 йилда «Ўзбекнефтгаз» ва «Татнефть» нефть компанияси Ўзбекистонда қидирув ишлари бўйича шартнома имзолаган эди.
Иккинчидан, Тошкент шаҳрида «Татнефть» ёқилғи қуйиш шохобчалари тармоғи яратилмоқда. Бу ерда корхона томонидан АИ-95, АИ-92 русумли бензин ва дизель ёқилғиси, Ўзбекистонда ишлаб чиқарилган АИ-80 русумли бензин, шунингдек, метан сотилади.
Учинчидан, «Татнефть» Ўзбекистондаги турли лойиҳаларга сармоя киритишга вақти-вақти билан қизиқиш билдиради. Масалан, 2019 йилда компания йирик шиналар ишлаб чиқарувчи «Биринчи Резинотехника Заводи» МЧЖнинг 51 фоизини олмоқчи эди.
Бундан ташқари, компания «Ўзбекнефтгаз» билан мутахассисларининг малакасини ошириш соҳасида ва кичик тоннали газ кимёси лойиҳаларни бўйича ҳам ҳамкорлик қилади.
Аввалроқ Украинадаги уруш туфайли Ўзбекистон бир қатор компаниялардан айрилгани ҳақида хабар берилган эди.
Изоҳ (0)